करोना व्हायरसच्या प्रादुर्भावामुळे इटलीत दररोज शेकडो मृत्यू होत आहेत. हजारो लोकांनी जीव गमावल्यानंतर इटलीला पहिला दिलासा मिळाला आहे. गेल्या दोन दिवसांपासून मृतांचा आकडा कमी झाला आहे. हा क्रम असाच सुरू राहिल्यास इटलीतील संसर्गाचा धोका कमी होत जाईल, असं जाणकारांचं म्हणणं आहे. इटलीत आतापर्यंत ६ हजारपेक्षा जास्त जणांचा करोनाने बळी घेतला आहे.
जगातील १९५ देशात करोनाचे रुग्ण आहेत. यात इटलीने चीनलाही मागे टाकलं. जगभरात आतापर्यंत ३ लाख ८१ हजार ५९८ लोक करोनाबाधित आहेत. यापैकी एक लाख लोकांवर उपचार करुन रुग्णालयातून सोडण्यात आलं आहे, तर १६ हजार ५५९ जणांचा करोनामुळे मृत्यू झाला आहे. इटलीतील मृतांचा आकडा चीनपेक्षाही जास्त आहे.
इटलीमध्ये आतापर्यंत ६०७७ जणांचा मृत्यू झाला आहे. पीटीआयच्या आकडेवारीनुसार, इटलीत गेल्या दोन दिवसात मृतांची संख्या कमी झाली. शनिवारी इटलीत तब्बल ७९३ लोकांचा मृत्यू झाला होता. या आकडेवारीनंतर जगभरात प्रचंड दहशत पसरली होती. शनिवारी ७९३, रविवारी ६५१ आणि सोमवारी ६०१ मृत्यू नोंदवण्यात आले. आकडा अत्यंत कमी प्रमाणात घटला असला तरी सध्या हा एकमेव दिलासा म्हणता येईल.
इटलीमध्ये सोमवारी करोनाचे ४७८९ नवे रुग्ण आढळून आले, तर रविवारी हा आकडा ६५५७ एवढा होता. त्यामुळे करोनाबाधितांचाही आकडा कमी होत असल्याचं चित्र आहे. करोनावर विजय मिळवला असं म्हणण्यासारखी तर परिस्थिती नाही, पण गेल्या दोन दिवसात संसर्गाचा आकडा कमी होत आहे, अशी प्रतिक्रिया इटलीतील एका वैद्यकीय अधिकाऱ्याने दिली.
करोना व्हायरसचा जन्म जिथे झाला, त्या चीनमध्येही नवीन ७८ रुग्ण आढळून आले. यापैकी ७४ परदेशातून आलेले नागरिक आहेत. चीनमध्ये आतापर्यंत ३२७७ जणांचा करोनामुळे मृत्यू झाला आहे. तर ८१ हजार १७१ जणांना संसर्ग झाला आहे. यापैकी ४७३५ जणांवर अजूनही उपचार सुरू आहे, तर ७३ हजार १५९ जणांना उपचारानंतर घरी पाठवण्यात आलं आहे.