वाशी येथे एका खासगी रुग्णालयात उपचार घेत असलेल्या एका महिलेचा आज मृत्यू झाला. मात्र, या महिलेच्या मृत्यूचं कारण गुलदस्त्यात आहे. या महिलेचा मृत्यू करोनाने झाला की अन्य कारणाने याचा तपास केला जात असल्याचं आरोग्य विभागाकडून सांगितलं जात आहे. या महिलेचा करोनाने मृत्यू झाल्याचं निष्पन्न झाल्यास राज्यातील करोनाचा हा चौथा बळी असेल असेही सूत्रांनी सांगितलं.
काही वृत्तसंस्थांच्या वृत्तानुसार ही महिला वाशीतील एका खासगी रुग्णालयात उपचार घेत होती. तिला करोनाची लागण झाल्याचंही निष्पन्न झालं होतं. मात्र, तिचा करोनानेच मृत्यू झाल्याचं अद्याप स्पष्ट झालेलं नाही. आरोग्य विभाग याबाबत तपास करत आहे. तपासानंतरच या महिलेच्या मृत्यूचं नेमकं कारण समजणार आहे.
काही वृत्तसंस्थांनी ही महिला ६५ वर्षाची महिला असल्याचं म्हटलं आहे. तर काहींनी ही २४ वर्षाची तरुणी असल्याचं म्हटलं आहे. आरोग्य विभागाकडून अद्याप याबाबतचा कोणताही खुलासा करण्यात आलेला नाही. दरम्यान, मुंबई आणि ठाण्यात आज आणखी दोन नवे करोना रुग्ण आढळल्याने राज्यातील करोनाबाधितांची संख्या १२४वर गेली आहे. राज्यात मुंबई शहर आणि उपनगर ५२, पिंपरी चिंचवड मनपा १२, पुणे मनपा १९, नवी मुंबई ५, कल्याण ५, नागपूर ४, यवतमाळ ४, सांगली ९, अहमदनगर ३, ठाणे ४, सातारा २ आणि पनवेल, उल्हासनगर, औरंगाबाद, रत्नागिरी, वसई-विरारमध्ये प्रत्येकी एक करोना रुग्ण आढळला आहे.