नवी मुंबई नवी मुंबई पोलिसांच्या अनैतिक मानवी वाहतूक प्रतिबंधक कक्षाने पनवेल कामगार आयुक्तालयाच्या मदतीने खारघर परिसरात वेगवेगळ्या ठिकाणी छापे मारून पाच बाल कामगारांची सुटका केली. तसेच या बाल कामगारांना कमी वेतनात अतिश्रमाचे काम देऊन राबवून घेणाऱ्या चार आस्थापना चालकांवर गुन्हे दाखल करून त्यांना ताब्यात घेण्याची कारवाई केली. खारघर परिसरातील गॅरेज, हॉटेल व दुकानांमध्ये बालकामगारांना कामावर ठेवण्यात आल्याची माहिती अनैतिक मानवी वाहतूक प्रतिबंधक कक्षाचे वरिष्ठ पोलिस निरीक्षक अर्जून गरड यांना मिळाली होती. त्यानुसार गरड यांनी या आस्थापनांचा शोध घेऊन त्यांच्यावर कारवाई करण्याच्या सूचना दिल्या होत्या. त्यानुसार अनैतिक मानवी वाहतूक प्रतिबंधक कक्षातील सहाय्यक पोलिस निरीक्षक भोर व त्यांच्या पथकाने पनवेल कामगार आयुक्तालयाच्या अधिपत्याखालील दुकाने निरीक्षकांसह गुरुवारी संयुक्तरित्या छापे मारले. या कारवाईत पथकाने दुपारी खारघर सेक्टर-३५मधील आर. के. ऑटो पार्ट्स या गॅरेजवर छापा मारून त्या ठिकाणी कामाला असलेल्या १६ व १७ वयोगटातील दोन मुलांची सुटका केली. या गॅरेजचा चालक राजन बद्री गौड याने दोन्ही अल्पवयीन मुलांना मागील महिनाभरापासून तीन हजार रुपये इतक्या कमी वेतनात गॅरेजमध्ये कामाला ठेवल्याचे तसेच त्यांच्याकडून अतिश्रमाचे काम करून घेत असल्याचे आढळून आले. त्यानंतर पथकाने खारघर सेक्टर-३मधील फिरोज ऑटो गॅरेजवर छापा मारून त्याठिकाणी कामास असलेल्या १५ वर्षीय मुलाची सुटका केली. गॅरेजचा मालक फिरोज समीम राईन याने मुलाला वेतनाऐवजी खाण्यास व राहण्यास देऊन आपल्या गॅरेजमध्ये कामाला ठेवल्याचे तसेच त्याच्याकडून अतिश्रम असलेली सर्व प्रकारची कामे करून घेत असल्याचे आढळून आले. खारघर सेक्टर-४मधील सुपर चिकन एग्ज सेंटरवर छापा मारून त्या ठिकाणावरून १५ वर्षीय मुलाची सुटका केली. या एग्ज सेंटरचा मालक वली बादशहा शेख याने अल्पवयीन मुलाला मागील दोन महिन्यांपासून आठ हजार रुपयांमध्ये कामाला ठेवल्याचे तसेच त्याच्याकडून अतिश्रमाचे काम करवून घेत असल्याचे आढळून आले. पोलिसांनी खारघर सेक्टर-१२मधील शिव भोजनालयावर छापा टाकून १६ वर्षीय मुलाची सुटका केली.