करोनाच्या पार्श्वभूमीवर इंग्रजी शाळांनी नियोजित वेळापत्रकापेक्षा लवकर परीक्षा घ्याव्यात, असे आवाहन इंडिपेंडेंट इंग्लिश स्कूल्स असोसिएशन (ईसा) संघटनेतर्फे प्रदेशाध्यक्ष राजेंद्र दायमा व राष्ट्रीय संघटक ललित गांधी यांनी केले आहे. याबाबतचे पत्र कोल्हापुरातील इंग्रजी शाळांना पाठवण्यात आले असून काही शाळा व्यवस्थापनांकडून कार्यवाही करण्याबाबत प्रतिसाद देण्यात आला आहे.
या पत्रात म्हटले आहे की, शैक्षणिक वर्ष पूर्ण होत असल्याने जवळपास सर्वच शाळांचा अभ्यासक्रम पूर्ण झालेला आहे. तरी ज्या शाळांचा अभ्यासक्रम बाकी असेल अशा शाळांनी तातडीने अभ्यासक्रम पूर्ण करावा. त्यासाठी काही जादा तास घ्यावेत. ज्या शाळांमध्ये परीक्षा पूर्ण झालेली आहे, अशा शाळांनी तत्काळ सुट्ट्या द्याव्यात. सर्व शाळांनी सकाळची सामूहिक प्रार्थना रद्द करून वर्गामध्ये प्रार्थना घ्यावी. शाळेत नियोजित असलेल्या सर्व क्रीडा स्पर्धा व रोजचे क्रीडा तास रद्द करण्यात यावेत. सर्दी खोकला असलेल्या विद्यार्थ्यांना घरी थांबण्याच्या सूचना द्याव्यात व अशा विद्यार्थ्यांचा आजार बरा झाल्यानंतर शक्य असल्यास फेरपरीक्षा घ्यावी. जेणेकरून विद्यार्थ्यांचे शैक्षणिक नुकसान होणार नाही. आजारी विद्यार्थ्यांचे शाळेमध्ये समुपदेशन करण्यात यावे व सर्व शिक्षकांना विद्यार्थ्यांच्या तब्येतीवर लक्ष ठेवण्याच्या सूचना द्याव्यात, असेही आवाहन ईसा संघटनेतर्फे सर्व शाळांना करण्यात आले आहे.