दरवर्षी होळी आली की, तमाम मराठी मनोरंजनसृष्टीला वेध लागतात ते रंगकर्मींच्या धुळवडीचे. शिवाजी पार्क किंवा वांद्रे येथे आळीपाळीने रंगकर्मींच्या या धमाकेदार धुळवडीचे आयोजन होते. यंदाचे वर्ष मात्र त्याला अपवाद आहे. कारण करोना व्हायरसचा धसका या कलाकार मंडळींनी घेतला असून या वर्षीचं धुळवड सेलिब्रेशन रद्द करण्यात आलं आहे.
जीवघेण्या ‘करोना’ व्हायरसने जगभरात थैमान घातले आहे. आत्तापर्यंत जगभरात ३ हजारांहून अधिक नागरिकांचा बळी या करोना व्हायरसने घेतलाय. जगभरात हा व्हायरस वेगाने पसरतोय. या व्हायरसचा प्रादुर्भाव रोखण्यासाठी एकाच ठिकाणी कोणत्याही प्रकारचा जमाव करायचा नाही. एकाच जागेवर लोकांनी एकत्र यायचं नाही, असं आवाहन जगभरातील आरोग्य तज्ज्ञाकंडून करण्यात आलंय. भारतातही करोनाचे काही रुग्ण आढळले आहेत. या पार्श्वभूमीवर मराठी आणि हिंदी सिनेसृष्टीतील कलाकार मंडळींची होळीच्या पार्ट्या रद्द करण्यात आल्या आहेत.अवधूत गुप्ते, श्रीरंग गोडबोले, अभिजीत पानसे, जयवंत वाडकर, पुष्कर श्रोत्री, अवधूत-मंदार वाडकर, अमेय खोपकर आदींच्या पुढाकारानं स्थापन झालेला ‘रंगकर्मी’ हा ग्रुप या धुळवडीचं आयोजन करतो.
करोना व्हायरस जगभरात वेगानं फोफावू लागल्यानं अफवांनाही वेग आला आहे. त्यामुळं ठिकठिकाणची सरकारं व प्रशासनाकडून नागरिकांना दिलासा देण्याचे प्रयत्न सुरू आहेत. असं असलं तरी ‘महाराष्ट्रात एकही करोनाग्रस्त रुग्ण (Coronavirus) आढळलेला नाही. त्यामुळं नागरिकांनी घाबरून जाऊ नये व कोणत्याही अफवांवर विश्वास ठेवू नये,’ असं आवाहन राज्याचे आरोग्यमंत्री राजेश टोपे (State Health Minister Rajesh Tope) यांनी केलं आहे.
दरम्यान , पंतप्रधान नरेंद्र मोदी यांनी देखील करोनामुळं होळीच्या सेलिब्रेशनमध्ये सहभागी होणार नाही असं जाहीर केलं आहे. करोना व्हायरसचा प्रादुर्भाव रोखण्यासाठी मोठ्या स्तरावर कोणत्याही कार्यक्रमाचे आयोजन करू नये. एकाच ठिकाणी लोकांचा जमाव होता कामा नये, असं आवाहन जगभरातील तज्ज्ञांनी केलं आहे. त्यामुळंच मी यंदा कोणत्याही प्रकारच्या ‘होळी मिलन’ समारंभात सहभागी होणार नाही, असं नरेंद्र मोदींनी ट्विटरवर म्हटलंय.