भिवपुरीजवळ आज सकाळी रेल्वे रुळाला तडा गेल्यानं मध्य रेल्वेची वाहतूक विस्कळीत झाली आहे. मुंबई-ठाण्याच्या दिशेने येणाऱ्या लोकलगाड्या विलंबाने धावत आहेत. सकाळी गर्दीच्या वेळी लोकलगाड्या उशिरानं धावत असल्यानं कामावर निघालेल्यांचे हाल झाले.\
कर्जत-भिवपुरी रेल्वे स्थानकांदरम्यान आज सकाळी पावणेदहाच्या सुमारास रुळाला तडा गेला. त्यामुळं मुंबई आणि ठाण्याकडे येणाऱ्या लोकलगाड्या २० ते २५ मिनिटे उशिराने धावत आहेत. मुंबई आणि ठाणे, उल्हासनगर या ठिकाणी सकाळी कामावर जाणाऱ्या नोकरदार वर्गाला मोठा त्रास सहन करावा लागला. दरम्यान, रेल्वे प्रशासनाला माहिती मिळताच, अधिकारी आणि कर्मचारी घटनास्थळी पोहोचले असून, दुरुस्तीचे काम हाती घेण्यात आले आहे.