नौपाड्यातील एका बांधकाम सुरू असलेल्या इमारतीच्या १७व्या मजल्यावरील शुक्रवारी दुपारी अचानक आग लागली होती. तीन तासांच्या अथक प्रयत्नानंतर ही आग विझवण्यात अग्निशमन जवानांना यश आले.
नौपाडा पोलिस ठाण्यापासून काही अंतरावरच सोहम ट्रॉपिकल युनिट या तळमजला अधिक २२ मजली इमारतीचे बांधकाम सुरू आहे. आतापर्यंत १७ मजल्यापर्यंत बांधकाम झाले आहे. येथील छतावर सेंट्रिंगचे काम चालू असताना शुक्रवारी दुपारी १ वाजून ५३ मिनिटांनी लाकडी आणि प्लास्टिकच्या साहित्यांना अचानक आग लागली. पालिकेच्या अग्निशमन दल आणि प्रादेशिक आपत्ती व्यवस्थापन कक्षाला माहिती मिळाल्यानंतर जवानांनी तत्काळ घटनास्थळी धाव घेतली. रस्त्यावरील वाहतूकही बंद करण्यात आली. यावेळी बघ्यांची गर्दीही झाली होती. इमारतीमधूनच पाण्याचे पाइप वर नेण्यात आले. तसेच ब्रॅन्टो गाडीच्या साहाय्यानेही आग विझवण्याचे प्रयत्न सुरू होते.