पुनर्वसनाचे रखडलेले काम करण्यासाठी ५० हजारांची ऑनलाइन लाच घेणाऱ्या सातारा तहसीलदार कार्यालयातील लिपिकाला लाचलुचपत प्रतिबंधक विभागाने अटक केली. रमाकांत फडतरे, असे अटक केलेल्या लिपिकाचे नाव असून, रात्री उशीरापर्यंत त्यांच्याविरोधात सातारा शहर पोलिस ठाण्यात गुन्हा दाखल करण्याची प्रक्रिया सुरू होती. सातारा तालुक्यातील एकाचे जमीन पुनर्वसनाचे काम सातारा तहसील कार्यालयात प्रलंबित होते. ते काम करण्यासाठी लिपिक फडतरे याने ५० हजारांची लाच मागितल्याची सातारा एसीबीला तक्रारदाराने माहिती दिली होती. त्यानंतर एसीबीने तहसील कार्यालयाच्या आवारात मंगळवारी सायंकाळी सापळा लावून लाच मागणीची पडताळणी केली. या वेळी फडतरे लाच मागत असल्याचे स्पष्ट झाले होते. त्यानंतर फडतरे याने लाचेची रक्कम त्याच्या बॅँक खात्यात भरण्यास तक्रारदाराला सांगितले. त्यानुसार तक्रारदाराने फडतरेच्या बॅँक खात्यात लाचेची रक्कम म्हणून ५० हजार रुपये भरल्यानंतर एसीबीने त्याला अटक केली. फडतरे याच्याविरोधात सातारा शहर पोलिस ठाण्यात गुन्हा दाखल करण्याची प्रक्रिया रात्री उशीरापर्यंत सुरू होती.