करोना विषाणूने चीनपाठोपाठ दक्षिण कोरियाला धडक दिली असून, युरोप आणि आखाती देशांमध्येही हातपाय पसरले आहेत. दरम्यान, चीनमध्ये करोनाचे आणखी १५० बळी नोंदविले असून, एकूण बळींची संख्या २६६३ वर पोहोचली आहे. चीनमधील करोनाग्रस्तांची संख्या ७७ हजारांवर पोहोचली आहे.
दक्षिण कोरिया, इटली आणि इराण या देशांना करोना विषाणूने विळखा घातला असून, गेल्या काही आठवड्यांपासून तेथे ‘करोना’चा संसर्ग वाढत आहे. बहारिन आणि कुवेतमध्ये सोमवारी ‘करोना’चे पहिले रुग्ण नोंदविण्यात आले इराणमध्ये आठ बळी नोंदविण्यात आले आहेत. दक्षिण कोरियात संसर्ग वाढला असून, आणखी १६१ रुग्ण नोंदविले आहेत. एकूण रुग्णसंख्या ही ८९३ वर पोहोचली आहे. या देशात अतिदक्षतेचा इशारा देण्यात आला आहे. त्यातही डेगू शहरात रुग्णांची संख्या अधिक असून, शहरात गर्दीच्या ठिकाणी शुकशुकाट जाणवत आहे. इटलीमध्ये १५० पेक्षा अधिक लोकांना संसर्ग झाला आहे. इटलीच्या अनेक भागांत लोकांना जास्त काळ घरी थांबण्याचे आवाहन करण्यात आले आहे. अफगाणिस्तानही करोना विषाणूचा पहिला रुग्ण नोंदविण्यात आला. नागरिकांनी देशाच्या पश्चिमेकडे विशेषत: इराणच्या दिशेने प्रवास करणे टाळावे, अशी सूचना अफगाण सरकारने केली आहे.
दरम्यान, करोना विषाणूच्या पार्श्वभूमीवर आशियातील शेअर बाजारावरही परिणाम झाला असून निर्देशांकात घसरण पाहायला मिळाली.
बीजिंग : वन्य प्राण्यांचा व्यापार आणि खाण्यासाठी वापर करण्यावर चीन सरकारने तत्काळ आणि सर्वंकश बंदी आणली आहे. या प्राण्यांचा खाण्यासाठी वापर केल्याने करोना विषाणूचा फैलाव झाला असल्याचे स्पष्ट झाले आहे.
‘करोना’च्या संसर्गामुळे संसदेचे वार्षिक अधिवेशन पुढे ढकलण्यात आले आहे. चीन सरकारने सोमवारी हे जाहीर केले. असा निर्णय पहिल्यांदाच घेण्यात आला असल्याचे सांगण्यात आले. अधिवेशन पाच मार्च रोजी होणार होते. वार्षिक अधिवेशन दोन आठवडे चालते. दरम्यान, चीन आणि जागतिक आरोग्य संघटनेच्या (डब्ल्यूएचओ) संयुक्त पथकाने हुबेई प्रांताला भेट देऊन परिस्थितीचा आढावा घेतला.
विमानफेऱ्या रद्द
इस्लामाबाद : पाकिस्तानने चीनकडे जाणाऱ्या विमानांच्या १५ मार्चपर्यंत रद्द केली आहेत. ३१ जानेवारी ते २ फेब्रुवारी दरम्यान विमानाच्या फेऱ्या रद्द करण्यात आल्याचे पाकिस्तानने यापूर्वी जाहीर केले होते. त्यानंतर ही मुदत वाढविण्यात आली. पाकिस्तानने इराणची सीमाही तात्पुरती बंद केली आहे. दरम्यान, चीनने पाकिस्तानला करोना विषाणूची चाचणी करण्यासाठी वैद्यकीय साधने पुरवली आहेत.