शहापूर तालुक्यातील वाऱ्याचा पाडा येथे एका सामाजिक संस्थेच्या कार्यक्रमाला आलेले राष्ट्रवादीचे अध्यक्ष शरद पवार यांचा पाहुणचार एका आदिवासी कुटुंबाने केला होता. कुडाच्या झोपडीमध्ये शरद पवार आणि गृहनिर्माण मंत्री जितेंद्र आव्हाड यांनी भोजन केल्यानंतर हे छायाचित्र सोशल मीडियावर विशेष चर्चेत होते. यावरून कौतुक आणि टीकाही झाल्या. परंतु ‘आयोजक’ संस्थेने या कुटुंबाच्या घरासाठी आर्थिक मदत करण्याचा निर्णय घेतला. संस्थेकडून आर्थिक सहाय्य देण्यात आले असून या गावकरी घरासाठी श्रमदान करणार आहेत. त्यामुळे या कुटुंबाला हक्काचे पक्के घर मिळू शकणार आहे.
शहापूर तालुक्यातील दोऱ्याचा पाडा येथील खासगी कार्यक्रमासाठी शरद पवार येणार होते. त्यांचे हॅलिपॅड वाऱ्याचा पाडा इथे तयार करण्यात आले होते. त्याच ठिकाणी एका कुडाच्या झोपडीमध्ये पवार यांच्या जेवणाची व्यवस्था करण्यात आली होती. रामचंद्र खोडके आणि कमला खोडके या आदिवासी दाम्पत्याची ही झोपडी आहे. गेल्या १५ ते २० वर्षांपासून ते या झोपडीत राहतात. त्यांना दोन मुले असून मुलगा दहावी तर मुलगी सातवी इयत्तेत आहे. परिसरातील आश्रमशाळेमध्ये ही दोन्ही मुले राहतात. घर बांधण्यासाठी पैसे नसल्याने कुडाच्या भिंतीची दरवर्षी डागडुजी करून हे कुटुंब ऊन-पावसाचे संकट झेलत होते. पवार येणार असल्याने त्यांनी विशेष तयारी करत घर सारवून लख्ख केले होते. कार्यक्रमाच्या ठिकाणावरून आणलेल्या खुर्च्या आणि टेबलावर त्यांची जेवणाची व्यवस्था केली. हे फोटो जितेंद्र आव्हाड यांनी सोशल मीडियावर टाकले होते. यानंतर या ठिकाणी कार्यक्रम आयोजन करणाऱ्या जिजाऊ प्रतिष्ठान या संस्थेने तात्काळ या कुटुंबाच्या घरबांधणीसाठी अर्थसाहाय्य करण्याचा निर्णय घेतला. त्यानंतर गावकऱ्यांनी श्रमदानाची तयारी सुरू केली आहे. अवघ्या १५ दिवसांमध्ये हे घर बांधून पूर्ण करण्याचा प्रयत्न या गावकऱ्यांनी केला आहे. त्यामुळे आदिवासी कुटुंबाला हक्काचे घर मिळू शकणार आहे.