डोंबिवली पश्चिमेकडील बावनचाळ परिसरातील कचराकुंडी शेजारी एका बॅगेत मृतदेह सापडल्याने खळबळ उडाली होती. विष्णूनगर पोलिसांना याची माहिती मिळताच तातडीने घटनास्थळी जात पोलिसांनी मृतदेह ताब्यात घेतला. काही वेळातच या मृतदेहाची ओळख पटली असून ठाणे येथील कोपरीमधील रहिवासी असल्याचे स्पष्ट झाले आहे. उमेश पाटील (५६) असे या व्यक्तीचे नाव असून हत्या करून मृतदेह बॅगेत भरून डोंबिवलीत फेकण्यात आल्याचा अंदाज पोलिसांनी लावला आहे. याप्रकरणी पोलिसांनी प्रफुल्ल पवार या आरोपीला अटक केली आहे.
विष्णूनगर पोलिस ठाण्यातून मिळालेल्या माहितीनुसार, उमेश पांडुरंग पाटील ( ४०) असे हत्या झालेल्या व्यक्तीचे नाव असून ते वाशी येथील केंद्रीय रिकव्हरी कार्यालयात सहाय्यक असिस्टंट म्हणून ते काम करत होते. ४ फेब्रुवारीला पाटील हे नेहमीप्रमाणे कामावर गेले. मात्र रात्री उशिरापर्यंत घरी आले नसल्याने त्यांच्या घरच्यांनी कोपरी पोलिस ठाण्यात उमेश पाटील हे हरवल्याची तक्रार दिली होती. यानंतर पोलिसांनी त्यांच्या मोबाइलचे शेवटचे लोकेशन तपासले असता ते डोंबिवली शहरात असल्याचे दिसले. अखेर त्यांचा मृतदेह डोंबिवलीत सापडल्याची माहिती विष्णूनगर पोलिसांनी कोपरी पोलिस ठाण्याला कळवले असता तेथील पोलिसांनी पाटील यांच्या घरच्यांना याची माहिती दिली. नातेवाईकांनी मृतदेहाची ओळख पटवून ताब्यात घेतला आहे. हा मृतदेह सडलेल्या अवस्थेत असल्यामुळे ज्या दिवशी ते बेपत्ता झाले त्याच दिवशी त्यांची हत्या झाली असावी, असा पोलिसांनी संशय व्यक्त केला.