नगर-औरंगाबाद महामार्गावर गजराजनगर येथील गादी कारखाना मंगळवारी आगीत खाक झाला. शॉर्टसर्किटमुळे कारखान्याला आग लागल्याचे सांगितले जात आहे. सायंकाळी चार वाजण्याच्या सुमारास ही घटना घडली. महापालिकेच्या अग्निशमन दलाला आगीची माहिती देण्यात आली होती; परंतु गाडी येईपर्यंत आग संपूर्ण कारखान्यात पसरली.
महामार्गालगत अमिर जाकीर शेख यांचा गादी कारखाना आहे. आग लागली तेव्हा कामगारही कारखान्यातच होते. मात्र, कामगार तातडीने कारखान्याबाहेर आले. तोपर्यंत कापड, कापसामुळे आग सर्वत्र भडकली. कारखान्याला आग लागल्याची माहिती महानगरपालिकेच्या अग्निशमन केंद्राला देण्यात आली होती. एक टेम्पो कारखान्यात अडकला होता. तो नागरिकांनी बाहेर काढला; मात्र, अवघ्या पाच किलोमीटरवर असलेल्या ठिकाणी जाण्यासाठी अग्निशमन दलाच्या गाडीला अर्धा तासापेक्षा जास्त कालावधी लागला. तोपर्यंत आग सर्वत्र लागून कारखान्यातील साहित्य जळून खाक झाले होते. कारखान्याजवळील विद्युत रोहित्रापर्यंत आग गेली होती. तोपर्यंत अग्निशमन दलाची गाडी आल्याने मोठा अनर्थ टळला. या आगीची शेजारचे बांबू विक्रीचे दुकान व इतर दुकानांना झळ बसली आहे.
महामार्गाच्या कडेला हा कारखाना असल्यामुळे परिसरात वाहतूक कोंडी झाली होती.