मोटारसायकल, कार चोरीला जाण्याचे प्रकार अनेकदा घडतात. मात्र लाखो रुपयांची जेसीबी मशीन चोरीला गेल्याचा प्रकार समोर आला आहे. घोडबंदर रोड परिसरातून ही मशीन चोरणाऱ्या दोघांना पुणे जिल्ह्यातील दौंड तालुक्यातून कासारवडवली पोलिसांनी अटक केली आहे. त्यांच्याकडून २७ लाखांचे जेसीबी मशीनही हस्तगत केले असून एक आरोपी अद्याप फरार आहे.
व्यावसायिक अभिमन्यू मढवी यांनी त्यांचे जेसीबी मशीन २४ जानेवारी रोजी वाघबीळ रोडवर मोकळ्या जागेत उभे केले होते. दुसऱ्या दिवशी सकाळी मशीन जागेवर नसल्याचे दिसून आले. मढवी यांनी ठाणे, मुंबईमध्ये मशीनचा शोध घेतला. परंतु मशीन न मिळाल्याने कासारवडवली पोलिस ठाण्यात चोरीची तक्रार केली. जेसीबी मशीनचा शोध घेऊन आरोपींना तत्काळ अटक करण्याचे आदेश वरिष्ठ पोलिस निरीक्षक किशोर खैरनार यांनी पथकाला दिले होते. ज्या ठिकाणाहून जेसीबी मशीनची चोरी गेली त्या आसपासच्या भागातील सीसीटीव्ही फुटेजची तपासणी केली. तांत्रिक बाबींचा अभ्यास केला असता आरोपी कल्याण, मुरबाड, जुन्नर, पारनेरमधील असल्याची पोलिसांना शंका होती. मात्र आरोपी पुणे जिल्ह्यातील दौंड येथे असल्याचे तपासात आढळले. बोरीवेल, आलेगावात धडकलेल्या पोलिसांनी सुमित चितारे (२१) आणि एक १८ वर्षांचा मुलगा अशा दोघांना अटक केली. त्यांच्याकडून जेसीबी मशिन हस्तगत करण्यात आली आहे. सुमित हा रेती उपसा करत असून दुसरा आरोपी शेती करतो. तर, बाळासाहेब पोटे हा आरोपी फरार आहे. रेती उपशासाठी आरोपींनी जेसीबीची चोरी केल्याची माहिती पोलिस अधिकाऱ्यांनी दिली.