आयुष्यभर कष्ट करून कमावलेली लाखो रुपयांची पुंजी एका ज्येष्ठ नागरिकाने गमावली. गुंतवणूक व्यवसायात अधिक व्याजदराचे आमिष दाखवून या ज्येष्ठ नागरिकाची तब्बल साडेचार लाख रुपयांची फसवणूक करण्यात आली. याप्रकरणी या ज्येष्ठ नागरिकाने लोकमान्य टिळक मार्ग पोलिस ठाण्यात तक्रार केली आहे.
भाईंदर येथे राहणारे दयाशंकर हे क्राऊटन कंपनीतून २००८ मध्ये सेवानिवृत्त झाले. त्यानंतर सुरू असलेल्या पेन्शनवर आणि बँकेत जमा रकमेवर दयाशंकर यांचा उदरनिर्वाह चालला होता. यादरम्यान दयाशंकर यांनी एक जाहिरात पाहिली. यामध्ये मेसर्स मिशिन कॅपिटल आणि इन्व्हेस्टमेंट या कंपनीत गुंतवणूक केल्यास महिन्याला १ हजार रुपयांना १० टक्के व्याज आणि वर्षाच्या शेवटी गुंतविलेल्या रकमेवर १० ते १५ टक्के बोनस दिला जाईल, असे नमूद करण्यात आले होते. बँकेपेक्षा अधिक मोबदला मिळणार असल्याने दयाशंकर यांनी पैसे गुंतविण्यासाठी जाहिरातीमधील क्रमांकावर संपर्क केला. राजीव खन्ना नावाच्या व्यक्तीसोबत त्यांनी आपल्या कटुंबातील सर्वांच्या नावाचा करार केला आणि चार लाख ६५ हजार रुपयांची गुंतवणूक केली. व्याज आणि बोनसचे राजीव खन्ना याने दयाशंकर यांना चेक दिले. मात्र हे चेक वटलेच नाहीत, तर काही चेक खात्यामध्ये रक्कम नसल्याने बाऊन्स झाले. याबाबत विचारणा करण्यासाठी खन्ना यांचा मोबाइल लावण्याचा प्रयत्न केला मात्र तो बंद येत असल्याने दयाशंकर यांनी मरिन लाइन्स येथील कंपनीचे कार्यालय गाठले. याठिकाणी जाऊनही दयाशंकर यांची निराशा झाली. कार्यालय बंद होते आणि आजूबाजूला राजीव याच्याबाबत कुणालाच काही माहीत नव्हते.
दयाशंकर यांना प्रचंड मानसिक धक्का बसला होता. २०१० ते २०१८ या कालावधीत राजीव याला शोधण्यासाठी त्यांनी जंगजंग पछाडले. याच कालावधीत त्यांच्या पत्नीचे निधन झाले आणि त्यांच्यावरही बायपास शस्त्रक्रिया करण्यात आली. आयुष्याची पुंजी हडप करणारा राजीव खन्ना सापडत नसल्याने अखेर त्यांनी पोलिसांत धाव घेतली. जास्त व्याजाने परतावा देण्याचे आमिष दाखवून फसवणूक केल्याप्रकरणी मेसर्स मिशिन कॅपिटल आणि इन्व्हेस्टमेंट या कंपनीविरोधात लोकमान्य टिळक मार्ग पोलिस ठाण्यात गुन्हा दाखल करण्यात आला आहे.