२२ वर्षीय महिलेच्या गुप्तांगात मिरची पावडर टाकून तिला बेदम मारहाण केल्याची धक्कादायक घटना गुजरातमधील अहमदाबाद येथे घडली आहे. या प्रकरणी पीडित महिलेनं शुक्रवारी वाडज तिघींविरोधात पोलीस ठाण्यात तक्रार दाखल केली आहे. आरोपींमधील एक महिला ही तिच्या पूर्वीच्या प्रियकराची पत्नी आहे, अशी माहितीही समोर आली आहे.
पीडित महिलेच्या तक्रारीनुसार, ती चार वर्षांपूर्वी गिरीश गोस्वामी यांच्या नरनपुरा येथील कपड्यांच्या दुकानात काम करत होती. त्या काळात गिरीश आणि ती दोघेही एकमेकांच्या प्रेमात पडली. या दोघांचे प्रेमसंबंध जवळपास दोन वर्षे होते. त्यानंतर दोघांचा ‘ब्रेकअप’ झाला आणि पीडित महिला वस्त्रपूरच्या एका कपड्याच्या दुकानात काम करू लागली. दोन महिन्यांपूर्वी गिरीशनं पुन्हा तिला फोन केला आणि दोघे एकमेकांशी फोनवरून बोलू लागले. एका महिन्यापूर्वी गिरीशची पत्नी जानू गोस्वामी हिला हे दोघे एकमेकांच्या पुन्हा संपर्कात आल्याचं कळलं. तिनं पीडितेला फोनवरून धमकावलं.
तक्रारीनुसार, पीडिता गुरुवारी सकाळी पावणे दहाच्या सुमारास वाडज येथील घरातून बाहेर पडली. ती प्रगतीनगर येथे जात होती. त्याचवेळी जानू आणि तिची मैत्रीण रिंका गोस्वामी या दोघी स्कूटरवरून आल्या. त्यांनी पीडितेला स्कूटरवर बसवले आणि जानूच्या घरी नेले. तिथे ठकुरी ही त्यांची आणखी एक मैत्रीण होती. तिघींनीही तिला एका खोलीत डांबून ठेवले. ‘ठकुरी हिनं रिंका आणि जानूला माझे कपडे उतरवून गुप्तांगात मिरची पावडर टाकण्यास सांगितले. त्यानंतर त्यांनी माझ्या गुप्तांगात मिरची पावडर टाकली. मी वेदनेनं विव्हळले. त्यानंतर त्यांनी मोबाइल फोनमध्ये व्हिडिओही काढला,’ असंही पीडितेनं तक्रारीत म्हटलं आहे.
गिरीशची पत्नी जानूनं पीडितेला धमकावलं. तसंच ५० लाख रुपयांची मागणी केली. गिरीशनं तिच्यावर लाखो रुपये खर्च केले असा तिनं आरोप केला. याशिवाय गिरीशला पुन्हा भेटण्याचा प्रयत्न केला तर, चेहऱ्यावर अॅसिड फेकू अशी धमकीही दिली. त्यानंतर त्यांनी पीडितेला सोडून दिले. या प्रकरणी तिघींनाही अटक करण्यात आली असून, त्यांच्याविरोधात गुन्हा दाखल केला आहे, अशी माहिती पोलीस निरीक्षक जे. ए. राठवा यांनी दिली.