विरार पूर्वे येथे एका बॉडीबिल्डरने आत्महत्या केल्याचं समोर आलं आहे. अली सालेमानी असं या ३५ वर्षीय बॉडीबिल्डरचं नाव आहे. अली सालेमानी याने राहत्या घरात गळफास घेऊन आत्महत्या केली. आर्थिक परिस्थितीला कंटाळून आली सालेमानी याने जीवन संपवण्याचं टोकाचं पाऊल उचललं.
विरार येथील शिवलीला अपार्टमेन्टमध्ये राहणाऱ्या बॉडीबिल्डर अली सालेमानी याने आपल्या राहत्या घरात गळफास घेत आत्महत्या केली. आर्थिक परिस्थितीसमोर हतबल होऊन त्याने हे टोकाचे पाऊल उचललं. त्याने तीन वेळा वसई श्री, एकदा दहिसर श्री आणि ज्युनियर महाराष्ट्र श्री स्पर्धेचा किताब आपल्या नावे केला होता. दरम्यान, गेल्या अनेक वर्षांपासून त्याने अनेक तरुणांना शरीरसौष्ठव स्पर्धेसाठी मार्गदर्शन केले होते. मात्र अनेक दिवसांपासून त्याची आर्थिक परिस्थिती खालावली होती. अखेर कंटाळून त्याने आत्महत्या केल्याची प्राथमिक माहिती समोर आली आहे. त्याच्या मागे दोन मुली, बायको आणि एक मुलगा असा परिवार आहे. या घटनेचा पोलीस अधिक तपास करत आहेत.