देशातील सर्व सरकारी बँका आज, शुक्रवारी आणि शनिवारी १ फेब्रुवारी रोजी संपावर जाणार आहेत. बँक कर्मचारी संघटनांची मध्यवर्ती संघटना असलेल्या युनायटेड फोरम ऑफ बँक युनियन्स आणि इंडियन बँक्स असोसिएशन यांच्यात वेतन सुधारणेच्या प्रलंबित मागणीवर गुरुवारी कोणतीही सहमती न झाल्यामुळे संपाचा निर्णय घेण्यात आला आहे.
भारतीय स्टेट बँकेसह अन्य काही बँकांनी आपापल्या ग्राहकांना या संपाविषयी गुरुवारी माहिती दिली. सलग दोन दिवस चालणाऱ्या या संपामुळे कामकाजावर परिणाम होईल, असे या बँकांनी ग्राहकांना सांगितले आहे. शनिवारी, केंद्रीय अर्थसंकल्प असून त्या दिवशी सर्व सरकारी बँका संपावर असतील. यासंदर्भात माहिती देताना अखिल भारतीय बँक कर्मचारी संघटनेचे सरचिटणीस सी. एच. वेंकटाचलम म्हणाले, इंडियन बँक्स असोसिएशनसमवेत (आयबीए) गुरुवारी झालेली चर्चा निष्फळ ठरल्यामुळेच संपाचे हत्यार उपसावे लागले आहे. असोसिएशनच्या आडमुठ्या धोरणाचाच हा परिणाम असल्याचा आरोपही त्यांनी केला. बँकांच्या युनायटेड फोरमने वेतन सुधारणेची प्रमुख मागणी आयबीएकडे केली होती. नोव्हेंबर २०१७पासून ही मागणी प्रलंबित आहे. यासंदर्भात १३ जानेवारी रोजी मुंबईत फोरमची बैठक झाली होती. त्यामध्ये वेतन सुधारणेसंदर्भात आंदोलन तीव्र करण्याचे ठरवण्यात आले होते. यापूर्वीची वेतन सुधारणा १ नोव्हेंबर २०१२ ते ३१ ऑक्टोबर २०१७ या कालावधीसाठी झाली होती.