नवजात मुलींची खरेदी-विक्री करणाऱ्या टोळीचा मुंबई पोलिसांच्या गुन्हे शाखेने पर्दाफाश केला. पोलिसांनी एका १५ दिवसांच्या मुलीची खरेदी-विक्री करताना दोन महिलांसह तिघांना गुरुवारी अटक केली. मुलींना वाढवून त्यांना वेश्याव्यवसायात ढकलले जात असल्याचे या कारवाईवरून उघडकीस आले आहे.
वांद्रे येथील कुरेशीनगर झोपडपट्टीत स्त्री बालकाची विक्री करण्यासाठी काहीजण येणार असल्याची माहिती युनिट ९चे सहायक पोलिस निरीक्षक शरद धराडे यांना मिळाली. वरिष्ठ पोलिस निरीक्षक महेश देसाई यांच्या मार्गदर्शनाखाली सहायक निरीक्षक सुधीर जाधव आणि त्यांच्या पथकाने या ठिकाणी सापळा रचत तिघांना ताब्यात घेतले. शरीफा पठाण, मोहम्मद फझल पठाण आणि आफ्रिन खान अशी तिघांची नावे आहेत. पोलिसांच्या पथकाने तिघांची चौकशी केली असता बिहारमधील एका महिलेने मुलीची विक्री केल्याचे समोर आले. पंधरा ते वीस दिवसांचे बाळ घेऊन हे टोळके अन्य एका दलालाला विकण्यासाठी निघाले होते, मात्र त्यापूर्वीच पोलिसांनी त्यांना अटक केली.
विक्री करण्यासाठी आलेल्या तिघांकडून ताब्यात घेतलेल्या मुलीला तिच्या जन्मदात्या आईनेच विकल्याचे चौकशीतून पुढे आले आहे. तिघांना अटक केल्याचे समजताच तिची आई पसार झाली असून तिने १० हजारांत मुलीला विकले होते. पोलिस मुलीच्या आईचा शोध घेत आहेत.