मुंबई लोकलमध्ये अलार्मच्या सूचना फलकावर अखेर मराठी संदेश झळकला आहे. लोकलमधील अर्लामचे सूचना फलक फक्त हिंदी आणि इंग्रजी भाषेत होते. त्याविरोधात अलार्मच्या सूचना फलकावर अज्ञातांनी ‘इथे मराठी हवीच’, असे स्टिकर लावले होते. हे स्टिकर्स चर्चेचा विषय ठरत होते. अखेर रेल्वे प्रशासनाने याची दखल घेत मराठी संदेश असलेले अलार्म फलक लोकलमध्ये लावण्यात आले आहेत.
हिंदी आणि इंगज्रीत संदेश असणारी पाटी कायम ठेवून त्यावर मराठीत संदेश असलेला छोटा फलक लावण्यात आला आहे. ‘गाडी उभी करण्यासाठी साखळी ओढावी’, असा मराठी संदेश असणाऱ्या या फलकावर इतर सुचना देखील मराठीत नमूद करण्यात आल्या आहेत.
अलार्म फलक मराठी भाषेत नसल्याने लोकलमध्ये ‘इथे मराठी हवीच’, असे स्टिकर्स लावण्यात आले होते. हे स्टिकर्स कोणी लावले, याबाबत अनभिज्ञता असली, तरी राज्यातच मराठी भाषेची होत असलेली उपेक्षा पुन्हा एकदा प्रकाशझोतात आली होती. आंदोलन न करता स्टिकर लावणाऱ्या अज्ञात मराठी भाषाप्रेमीच्या गांधीगिरीचे कौतुकही झाले. अखेर रेल्वेनेही या मराठी भाषाप्रेमीच्या माणगीची दखल घेतली.