मुंबई विद्यापीठाच्या कलिना कॅम्पसमधील परीक्षा विभाग इमारतीच्या तिसऱ्या मजल्यावरील एका अधिकाऱ्याच्या केबीनमधील छताचा पीओपीचा भाग गुरुवारी दुपारी कोसळला. खोलीत अधिकारी किंवा कोणीही नसल्याने मोठी दुर्घटना टळली. मात्र, या घटनेमुळे परीक्षा भवनाच्या दुरवस्थेचा प्रश्न पुन्हा ऐरणीवर आला आहे.
कलिना कॅम्पसमधील परीक्षा भवनाची इमारत मोडकळीस आली आहे. परीक्षा भवनसाठी विद्यापीठाने पर्यायी इमारत बांधली आहे. परंतु, निधीअभावी तिचे अंतर्गत काम रखडले आहे. त्यामुळे कर्मचाऱ्यांना धोकादायक इमारतीमध्ये काम करावे लागत आहे. परीक्षा विभागात रोज हजारो विद्यार्थी व पालक येत असतात. असे असतानाही या इमारतीला अशी अवकळा आली आहे. एखाद्या दुर्घटनेत जीवितहानी झाली तर त्याला जबाबदार कोण, असा प्रश्न उपस्थित करण्यात येत आहे.
अधिसभा सदस्य शीतल देवरुखकर-शेठ यांनी या इमारतीची दुरवस्था झाली असून तातडीने परीक्षा विभाग नवीन इमारतीत स्थलांतरित करावी अशी मागणी अधिसभेत केली होती. मात्र प्रशासनाने याची दखल घेतली नाही. या इमारतीमध्ये यापूर्वीही छताचा भाग कोसळल्याच्या घटना घडल्या आहेत.