उत्पन्नापेक्षा अधिक संपत्ती संपादित करणाऱ्या सेवानिवृत्त नायब तहसीलदारासह त्यांच्या पत्नीविरुद्ध गुन्हा दाखल करण्यात आला आहे. एकूण उत्पन्नाच्या ४७. ९२ टक्के इतकी अधिक अपसंपदा आढळून आली असून पोलिस उपअधीक्षक अधिकराव पोळ तपास करत आहेत.
अलिबाग तहसील कार्यालयातील तत्कालीन नायब तहसिलदार सुभाष माने यांच्याविरुद्ध ५ ऑक्टोबर २०१७ रोजी भ्रष्टाचार प्रतिबंधक कायद्यानुसार अलिबाग पोलिस ठाण्यात गुन्हा दाखल करण्यात आला होता. त्यानंतर माने यांनी संपादित केलेल्या मालमत्तेची उघड चौकशी करण्याचे आदेश लाचलुचपत प्रतिबंधक विभागाच्या महासंचालक कार्यालयाकडून देण्यात आले होते. या आदेशानंतर पोलिस निरीक्षक किरणकुमार बकाले यांनी चौकशी सुरू केली. १ जानेवारी ते ५ ऑक्टोबर २०१७ या कालावधीमधील माने आणि त्यांची पत्नी सुनंदा यांचे उत्पन्न, खर्च आणि मालमत्ता याबाबत दस्तऐवजाची तपासणी करण्यात आली. यामध्ये वर्षनिहाय वाढत जाणारे एकूण उत्पन्न ७४ लाख २० हजार २९९ रुपये असल्याचे समोर आले. या उत्पन्नातून वर्षनिहाय वाढत जाणारा एकूण खर्च ६६ लाख ८१ हजार ८५१ रुपये वजा केल्यानंतर शिल्लक केवळ ७ लाख ३८ हजार ४४८ रुपये राहतात. मात्र, संभाव्य शिल्लक रकमेतून परीक्षण कालावधीमध्ये संपादित केलेली ४१ लाख ६७ हजार ८४१ रुपयांची मालमत्ता वजा केल्यानंतर ३४ लाख २९ हजार ३९३ रुपये किंमतीची अपसंपदा माने यांनी संपादित केल्याचे एसीबीच्या चौकशीतून समोर आले.
ही अपसंपदा एकूण उत्पन्नाच्या ४७.९२ टक्के आहे. या उत्पन्नाचा हिशोब देऊ शकले नाहीत. त्यामुळे पोलिस निरीक्षक बकाले यांनी दिलेल्या तक्रारीनंतर सुभाष माने आणि त्यांच्या पत्नीविरुद्ध अलिबाग पोलिस ठाण्यात गुन्हा दाखल करण्यात आला. माने यांनी नोकरीच्या कालावधीत पदाचा, अधिकाराचा गैरवापर करून स्वतःच्या आणि कुटुंबाच्या नावावर अपसंपदा संपादित केली असून यासाठी पत्नीने सहाय्य केल्याचा ठपका ठेवण्यात आला आहे. माने दाम्पत्य अलिबागमधील वरसोली गावात राहतात.