केंद्रीय गृहमंत्री अमित शहा यांच्या नावे बनावट फोन केल्याप्रकरणी भारतीय हवाई दलातील अधिकाऱ्याला मध्य प्रदेश पोलिसांच्या विशेष पथकाने दिल्लीतून अटक केली आहे. विंग कमांडर कुलदीप वाघेला (३६) याने आपल्या एका डॉक्टर मित्राला वैद्यकीय महाविद्यालयाच्या कुलगुरुपदी नियुक्त करण्यासाठी राजभवन कार्यालयात फोन करुन ‘हॅलो, मी अमित शहा बोलतोय’, असं सांगत वशीला लावण्याचा प्रयत्न केल्याचा धक्कादायक प्रकार उघडकीस आला आहे.
विंग कमांडर कुलदीप वाघेला नवी दिल्लीतील हवाई दलाच्या मुख्यालयात कार्यरत आहे. त्याचा मित्र चंद्रेशकुमार शुक्ला (३९) हा ऑर्थोपेडिस्ट असून भोपाळच्या साकेत नगर येथे त्याचा दातांचा दवाखाना होता. या दोघांचीही आता पोलीस कोठडीत रवानगी करण्यात आली आहे.
विशेष म्हणजे, डॉ. शुक्ला याला बॉलिवूडचंही वेड असून त्याची मुख्य भूमिका असलेला ‘मेरे देश की धरती’ नावाचा सिनेमा देखील येऊ घातला आहे. याशिवाय, डेन्टल काऊन्सिल ऑफ इंडियाच्या अध्यक्षपदी कार्यरत होता. राज्यातील एका मंत्र्याचाही तो निकटवर्तीय असल्याची माहिती समोर आली आहे.
डॉ. चंद्रेशकुमार शुक्ला हा माजी राज्यपाल राम नरेश यादव यांचा निकटवर्तीय आहे. यादव यांच्या राज्यपालपदाच्या कार्यकाळात (२०११-१६) शुक्ला याचं राजभवनात येणंजाणं होतं. याच काळात शुक्ला याची विंग कमांडर कुलदीप वाघेला याच्याशी ओळख झाली आणि त्याचं पुढे मैत्रित रुपांतर झालं.
मध्य प्रदेश वैद्यकीय महाविद्यालयाच्या कुलगुरु पदासाठी मुलाखती सुरू होत्या. यात डॉ. शुक्लानेही मुलाखतीसाठी अर्ज केला होता. पोलिसांच्या माहितीनुसार, डॉ.शुक्लाची कुलगुरुपदी नियुक्ती व्हावी यासाठी कुलदीप वाघेला यानं राजभवन कार्यालयात बनावट फोन केला. ‘गृहमंत्री अमित शहांना बोलायचं आहे. राज्यपालांना फोन जोडून द्या’, असं राज्यपाल कार्यालयाच्या लँडलाइनवर सांगण्यात आलं. राज्यपाल कार्यालयाच्या ऑपरेटरने फोन राज्यपाल लालजी टंडन यांना जोडून दिला. त्यापुढे कुलदीप वाघेला यानं आपण अमित शहा बोलत असल्याचं भासवून डॉ. शुक्ला याची कुलगुरुपदी नियुक्ती करण्याचे आदेश दिले.
राज्यपाल टंडन यांना फोनबाबत शंका आल्याने त्यांनी त्वरित आपल्या अधिकाऱ्यांना फोनची पडताळणी करण्यास सांगितलं. अमित शहा यांच्या कार्यालयाशी संपर्क साधण्यात आल्यानंतर अशाप्रकारचा कोणताही फोन केला गेल्याचं सांगण्यात आलं आणि बनावट फोन असल्याचं निष्पन्न झालं. त्यानंतर राज्यपाल कार्यालयाने याची पोलिसांकडे तक्रार केली. पोलिसांनी आपली सुत्र हलवून फोन नेमका कुठून आला याची माहिती काढली आणि विंग कमांडर कुलदीप वाघेलाला अटक केली.