दोन्ही विवाह अयशस्वी झाल्याने तणावग्रस्त असलेल्या तरुणाचा मैत्रीण शोधण्याचा प्रयत्न आणखी अडचणीत ढकलणारा ठरला. वेबसाइटवरील भामट्याने अनेक मुलींचे फोटो व्हॉट्सॲपवर पाठवून निरनिराळी कारणे सांगत त्याच्याकडून तीन लाख रु. उकळले. याप्रकरणी पवई पोलिसांनी हावडा येथून फसवणूक करणाऱ्यास अटक केली.
पवई येथे राहणाऱ्या तरुणाची दोन्ही विवाह मोडले. तरुणाशी न पटल्याने दोन्ही पत्नी त्याच्यापासून विभक्त झाल्या. अनेक दिवसांपासून तणावाखाली असलेल्या या तरुणाने वेबसाइटवरून मैत्रीण शोधण्यास सुरुवात केली. वेबसाइटवरील एका व्यक्तीने या तरुणाशी संपर्क केला आणि काही तरुणींचे फोटो व्हॉट्सअॅपवर पाठविले. यापैकी एक तरुणी पसंद पडल्यानंतर तिच्यासोबत बोलण्यासाठी, तिचा संपर्क क्रमांक देण्यासाठी, गैरप्रकार करणार नाही याबाबत प्रतिज्ञापत्र बनविण्यासाठी अशा वेगवेगळ्या कारणांसाठी या व्यक्तीने तरुणाकडून तीन लाख वीस हजार रुपये घेतले. यानंतर मैत्रिणीची भेट घडवून न देता फसवणूक केली.
फसवणूक झाल्याचे लक्षात येताच या तरुणाने पवई पोलिस ठाण्यात तक्रार केली. मोबाइल नंबर आणि इतर तांत्रिक पुराव्यांवरून पवई पोलिसांनी हावडा येथून अर्णव सिंग उर्फ नील रॉय बनमली (२८) याला अटक केली. त्याने अशाच प्रकारे अनेकांची फसवणूक केल्याची शक्यता पोलिसांनी व्यक्त केली आहे.