दिल्लीतील पीरागढी परिसरात आज पहाटे एका फॅक्ट्रीला आग लागून झालेल्या स्फोटामुळे इमारत कोसळली आहे. या इमारतीखाली ३ अग्निशमन दलाच्या तीन जवानांसह अनेकजण अडकले असून अग्निशमन दलाने ढिगारा उपसण्याचं काम युद्धपातळीवर सुरू केलं आहे. इमारत अचानक कोसळल्याने या परिसरात प्रचंड घबराट पसरली आहे.
आज पहाटे ४ वाजून २३ मिनिटाने ही घटना घडली. एका फॅक्ट्रीला पहाटे आग लागली. या फॅक्ट्रीत लाकडी सामान असल्याने आगीने प्रचंड पेट घेतला. या आगीमुळे फॅक्ट्रीत अचानक जोरदार स्फोट झाला आणि फॅक्ट्रीची इमारतच कोसळली. त्यामुळे या परिसरात एकच हाहाकार माजला. लोकांमध्ये प्रचंड घबराट पसरून धावपळ उडाली. या दरम्यान, अग्निशमन दलालाही पाचारण करण्यात आलं. अग्निशमन दलाच्या ७ गाड्या घटनास्थळी दाखल झाल्या असून इमारतीचा ढिगारा बाजूला काढण्याचं आणि आग विझवण्याचं काम युद्धपातळीवर सुरू करण्यात आलं आहे. या ढिगाऱ्या खाली काही लोक अडकले असून त्यांना बाहेर काढण्यासाठी युद्धपातळीवर प्रयत्न सुरू करण्यात आले आहेत. स्थानिक नागरिकांनी एकच धावपळ सुरू केली.ही बॅट्री बनवणारी फॅक्ट्री असल्याचं सांगितलं जातं. आगीमुळे झालेल्या नुकसानीची काहीही माहिती मिळालेली नसून आगीचं कारणही अद्याप अस्पष्ट आहे. दरम्यान, दिल्लीत आग लागण्याची ही तिसरी घटना आहे. काही दिवसांपूर्वी दिल्लीच्या धान्य बाजारात मोठी आग लागली होती. त्यात ४३ लोकांचा मृत्यू झाला होता. त्यानंतर किराडीमध्येही अशीच घटना घडली होती. त्यावेळी ९ लोकांचा मृत्यू झाला होता.