‘ओएलएक्स’वर मोबाइल फोन विकणे एका भारतीय सैन्य दलातील मेजर दर्जाच्या अधिकाऱ्याला चांगलेच महागात पडले. अज्ञाताने मेजरला ‘क्यू आर कोड’ स्कॅन करण्यास भाग पाडून त्यांच्या खात्यावरून १९ हजार ५०८ रुपये परस्पर काढून घेतले. गुरुवारी (२६ डिसेंबर) सकाळी पिंपळे गुरव परिसरात ही घटना घडली.
मेजर दौलत संपतराव बोरकर (वय ३५, रा. पिंपळे गुरव) यांनी या प्रकरणी सांगवी पोलिस ठाण्यात फिर्याद दिली आहे. त्यानुसार सहारूना ऐसुब (रा. भाटपूर, राजस्थान) व मोकम निरनसिंग आदिवासी (रा. खैरा, मध्य प्रदेश) यांच्या विरोधात गुन्हा दाखल करण्यात आला आहे.
बोरकर भारतीय सैन्य दलात मेजर म्हणून नियुक्तीला आहेत. त्यांना त्यांचा मोबाइल फोन विकायचा असल्याने त्यांनी ‘ओएलएक्स’वर जाहिरात दिली. ती पाहून आरोपींनी बोरकर यांच्याशी संपर्क साधला. ‘तुमचा मोबाइल फोन विकत घेऊन तुम्हाला पैसे पाठवतो,’ असे आरोपींनी बोरकर यांना सांगितले आणि एक ‘क्यू आर कोड’ स्कॅन करायला लावला. ‘क्यू आर कोड स्कॅन केल्यासच तुम्हाला पैसे मिळतील,’ असे सांगितले. बोरकर यांनी कोड स्कॅन केला असता आरोपींनी बोरकर यांच्या खात्यावरून १९,५०८ रुपये काढून घेऊन त्यांची फसवणूक केली. सांगवी पोलिस तपास करीत आहेत.