तळोजा भागात राहणाऱ्या एका १७ वर्षीय मुलीच्या तक्रारीवरून राज्याच्या पोलिस खात्यातील मोटार परिवहन (एमटी) विभागाचे पोलिस उपमहानिरीक्षक निशिकांत मोरे यांच्यावर तळोजा पोलिस ठाण्यात विनयभंगासह पोक्सो कायद्यानुसार गुन्हा दाखल करण्यात आला आहे. राज्याच्या पोलिस दलातील उच्चपदस्थ अधिकाऱ्यावर एका अल्पवयीन मुलीचा विनयभंग केल्याप्रकरणी गुन्हा दाखल झाल्याने पोलिस दलात खळबळ उडाली आहे.
पुण्यात एमटी विभागात कार्यरत असलेले पोलिस उप महानिरीक्षक निशिकांत मोरे हे खारघरमध्ये वास्तव्यास आहेत. तर पीडित मुलगी तळोजा भागात राहते. पीडित मुलीचे वडील आणि निशिकांत मोरे हे सात-आठ वर्षांपासून चांगले मित्र असल्याने मोरे यांचे पीडित मुलीच्या घरी नेहमी येणे जाणे होते. गेल्या ५ जून रोजी या मुलीचा वाढदिवस होता. त्या दिवशी पोलिस उप महानिरीक्षक निशिकांत मोरे हे आमंत्रण नसतानाही आपल्या कुटुंबासह त्या मुलीच्या घरी गेले होते. त्यावेळी मोरे यांनी या मुलीच्या वडिलांकडे मद्याची मागणी करून त्यांच्या घरामध्ये मद्य प्राशन केले. त्यानंतर मुलीने कापलेला केक तिच्या गालावर आणि अंगाला लावून तिच्यासोबत अश्लील वर्तन केले, असे पीडित मुलीने आपल्या तक्रारीत म्हटले आहे. याप्रकरणी मुलीचे वडील हे मोरे यांच्या विरोधात तळोजा आणि खारघर पोलिस ठाण्यात तक्रार दाखल करण्यासाठी गेले असताना पोलिसांनी तक्रार दाखल करून घेतली नाही, असा आरोप मुलीच्या वडिलांनी पत्रकार परिषदेत केला होता.
या प्रकरणाची सोशल मिडियावर वाच्यता झाल्यानंतर नवी मुंबई पोलिस टिकेचे धनी बनले होते. अखेर गुरुवारी तळोजा पोलिस ठाण्यात पोलिस उप महानिरीक्षक निशिकांत मोरे यांच्या विरोधात अल्पवयीन मुलीवर विनयभंग केल्याप्रकरणी तसेच पोक्सो अंतर्गत गुन्हा दाखल करण्यात आला.