म्हातारपणी मुलगा आपला सांभाळ करेल, या विश्वासाने वडिलांनी जून २०००मध्ये मुलाच्या नावे कायदेशीररीत्या हस्तांतर केलेला म्हाडाचा फ्लॅट त्यांना परत करण्याचा आदेश ज्येष्ठ नागरिक कायद्याअंतर्गतच्या अपील लवादाने मुलाला नुकताच दिला आहे. यामुळे फ्लॅटचे हस्तांतरण एकतर्फी रद्द करण्याची तरतूद म्हाडाच्या कायद्यात नसली, तरी ज्येष्ठ नागरिक कायद्यांतर्गत असलेल्या तरतुदीच्या माध्यमातून तसा दिलासा ज्येष्ठ नागरिकांना मिळवता येऊ शकतो, हे यानिमित्ताने अधोरेखित झाले आहे.
काळाचौकी येथील अभ्युदय नगरमधील रामदास शिंदे यांनी त्यांचा मुलगा जितेंद्र (दोन्ही नावे बदललेली आहेत) व त्याच्या पत्नीविरोधात छळवणुकीबद्दल पोलिस तक्रार केली होती. तसेच सन २०००मध्ये मुलाच्या नावे हस्तांतरण केलेला म्हाडाचा फ्लॅट परत मिळावा याकरिता म्हाडाकडे जुलै २०१६मध्ये अर्ज केला होता. मात्र म्हाडाने असमर्थता दर्शवल्यानंतर अपील लवादाने मात्र शिंदे यांना दिलासा दिला आहे.