पश्चिम रेल्वेच्या गोरेगाव-राममंदिर रेल्वे स्थानकादरम्यान केल्या जाणाऱ्या विकासकामांसाठी तब्बल ५७ आणि मेट्रोच्या विधानभवन, कफ परेड, सीएसटी, काळबादेवी स्थानकांच्या कामांसाठी ५२ झाडांची कत्तल केली जाणार आहे. या कत्तलीमध्ये वड, पिंपळ, कडुनिंब, आंबा, जांभूळ या पर्यावरणदृष्ट्या महत्त्वाच्या झाडांचा समावेश आहे. हा प्रस्ताव आज, शुक्रवारी होणाऱ्या वृक्ष प्राधिकरणाच्या बैठकीत मंजुरीसाठी मांडण्यात येणार आहे.
पश्चिम रेल्वेच्या सहाव्या मार्गिकेसाठी पूल उभारले जाणार आहेत. यासाठी ८९ झाडांचा अडथळा आहे. यापैकी ५२ झाडे कापली जाणार असून, ३२ झाडांचे पुनर्रोपण केले जाणार आहे. पुनर्रोपण केलेली झाडे जगतात का तसेच आतापर्यंत किती झाडे जगली याची माहिती पालिका देत नसल्याने ही झाडे अखेर मृत्युपंथाला लागत असल्याने त्यांचा समावेशही कापल्या जाणाऱ्या झाडांमध्ये करावा, अशी मागणी नगरसेवक करत आहेत. मेट्रोच्या विधानभवन, सीएसएमटी, कफ परेड आणि काळबादेवी स्थानकांच्या बांधकामाआड ५२ झाडे येत असून, ती कापण्यासाठी परवानगी देण्याची विनंती मेट्रोने मागितली आहे