पावसाळयात मंद विक्री असणाऱ्या फ्रीज तसेच कुलर विक्रीचा व्यवसाय करणाऱ्या व्यापाऱ्यांना सध्या ‘अच्छे दिन’ अनुभवयास मिळत आहेत. नांदेड शहरात तापमानाचा पारा कमी होण्याचे नाव घेताना दिसत नाही. भर पावसाळयातही नांदेडकरांची उन्हाने अक्षरशः लाहीलाही होत आहे.
वाढत्या तापमानामुळे भरपावसाळ्यातही फ्रीज तसेच कुलर विक्रीचा व्यवसायही जोरात आहे. साधरणतः जून महिन्याच्या पहिल्या आठवड्यात पावसाने हजेरी लावल्यानंतर फ्रीज व कुलरचा वापर कमी होत आहे. बहुतांश नागरिक कुलरचा वापर करत नाहीत किंबूहना त्यांची गरजही पडत नाही. परंतु, वाढत्या तापमानामुळे कुलरचा वापर सुरू आहे. उन्हाळा संपल्यानतर फ्रीज, कुलरचा व्यापार कमी होतो, परंतु यंदा त्यांना ‘अच्छे दिन’ आले आहेत. सूत्रांनी दिलेल्या माहितीनुसार छोटे कुलर दोन हजार २०० रुपये तर मोठे कुलर तर साधारणतः ३ हजार ५०० रुपयांना विक्री होतात. कुलर तयार करण्याचे शहरात ठिकठिकाणी कारखाने आहेत. पावसाळ्यातही मागणी असल्याने मे महिन्याच्या अखेरच्या आठवड्यात बंद पडणारे कारखाने अजूनही सुरू आहेत. कुलरसह फ्रीजलाही मोठी मागणी आहे. पावसाळ्यात हे व्यापारी ग्राहकांना आकर्षित करण्यासाठी वेगवेगळ्या सवलती देतात. परंतु, यंदा अशा डिस्काऊंटपासून ग्राहक वंचित आहेत.
फ्रीज, कुलरसह शीतपेयांची मागणी वाढली आहे. अनेक भागातील ज्युस सेंटर सायंकाळच्या वेळी गर्दीने फुलत आहेत. फळांचीही विक्री जोरात सुरू आहे. पिण्यासाठी थंड पाण्याची मोठ्या प्रमाणावर मागणी असल्याने या क्षेत्रातील व्यापाऱ्यांनी दर वधारले आहेत. पाणी विक्रीच्या व्यवसायातून शहरात लाखो रुपयांची उलाढाल होत आहे. हॉटेलमध्येही ग्राहक थंड पाण्यासाठी आग्रही आहेत.
मे महिन्याच्या अखेरपर्यंत व्यवसाय तेजीत असतो. गेल्या पाच वर्षांत यंदा प्रथमच मोठ्या प्रमाणावर कुलरची विक्री झाली. विशेष म्हणजे वाढत्या तापमानामुळे आजही ग्राहक कुलर खरेदीसाठी येत आहेत. गत वर्षाच्या तुलनेत यंदा कुलर विक्रीत तिप्पट वाढ झाली आहे. ग्राहकांची मागणी असल्याने अनेक बेरोजगार युवकांना चांगले काम मिळाले. वेगवेगळ्या भागातील कारखाने अजुनही सुरूच आहेत. यंदा नागरिकांची फरफट होत असली तरी कुलर विक्रीतून चांगला फायदा झाला.