कोणत्याही दुर्घटनेमध्ये वा अपघातामध्ये पहिला एक तास अत्यंत महत्त्वाचा असतो. त्याला ‘गोल्डन अवर’ म्हणतात. डोंगरी येथील केसरबाई इमारतीच्या दुर्घटनेमध्ये हा ‘गोल्डन अवर’ वाया जाऊ नये म्हणून जे. जे. रुग्णालयातील डॉक्टरांनी थेट दुर्घटनास्थळी धाव घेतली. ढिगाऱ्या खालून बाहेर काढल्या जखमींना तातडीने वैद्यकीय मदत मिळावी म्हणून रुग्णालय प्रशासनाने हा निर्णय घेतला होता. त्याबद्दल दुर्घटनेतून वाचलेल्या रुग्णांच्या नातेवाईकांनी समाधान व्यक्त केले.
डोंगरीची घटना समजल्यानंतर जे. जे. रुग्णालयातील सर्व विभागांना ‘अलर्ट’ देण्यात आला. सुमारे दीडेश डॉक्टरांची टीम ३० तास अथक काम करत होती. जखमी रुग्णांच्या नातेवाईकांची मानसिकता, मृत्यू झालेल्यांच्या कुटुंबीयांवर कोसळलेले आकाश आणि लोकप्रतिनिधी, राजकीय नेत्यांचे या सगळ्यांतून मार्ग काढत डॉक्टर्स आपले कर्तव्य बजावत होते. डॉक्टरांच्या या चमूमध्ये गरोदरपणाची रजा संपवून नुकतीच रुजू झालेली एक डॉक्टर होती. तिनेही आपल्या तान्ह्या बाळाला बाजूला ठेऊन जखमींची अविरत सेवा केली. मृतदेहांना शेवटचा निरोप सन्मानाने मिळावा यासाठी निवासी डॉक्टर, तृतीय व चतुर्थश्रेणीतील कर्मचाऱ्यांनीही रात्रीचा दिवस करून अनेकांना पहाडासारखा आधार दिला.
अशा घटनांनंतर डॉक्टरांवरही प्रचंड ताण असतो. समोर आलेली परिस्थिती थंड डोक्याने आणि संयमाने हाताळणाचे आव्हान त्यांच्यासमोर असते. हे आव्हान जे. जे.तील प्रत्येक डॉक्टरने लिलया पेलल्याबद्दल रुगणालयाचे अधिष्ठाता डॉ. अजय चंदनवाले यांनी समाधान व्यक्त केले.
नैसर्गिक आपत्तीच्या दुर्घटनेमध्ये मृत्यूसंदर्भात सहसा संशय नसतो, लोकभावना, दुर्घटनेची तीव्रता आणि कुटुंबीयांची मानसिकस्थिती लक्षात घेऊन मुंबई पोलिसांनी या मृतदेहांचे शवविच्छेदन करू नये, असे रुग्णालय प्रशासनाला कळवले. त्यानंतर मृतदेहांचे शवविच्छेदन न करता ते ओळख पटवून कुटुंबाकडे सोपविण्यात आले.