ठाणे जिल्ह्यातील मुरबाड तालुक्यात मोठ्या भावाने लहान भावाच्या संरक्षणासाठी थेट बिबट्याशी दोन हात केल्याची घटना घडली आहे. नरेश काळुराम भाला (वय १४) आणि हर्षद विठ्ठल भाला (वय ७) अशी दोन चुलत भावांची नावे आहेत.
मिळालेल्या माहितीनुसार, आपल्या शेतावरील कामासाठी आज्जीबरोबर ही दोन मुले गेली होती. आजी शेतात काम करण्यात व्यस्त होती. तोपर्यंत इकडे तिकडे दंगामस्ती करत लहानगे फिरत होते. भूक लागली म्हणून करवंद खाण्यासाठी एका झाडापाशी मुले पोहोचली. झाड्याच्या आडोशाला बिबट्या लपून बसला होता. झाडाजवळ जाताच बिबट्याने प्रथम नरेशवर हल्ला केला. मात्र, पटकन तो बाजूला झाला. त्यानंतर बिबट्याने आपला मोर्चा हर्षदकडे वळवला. हर्षद संकटात आहे, म्हटल्यावर प्रसंगावधान दाखवत शेजारी पडलेली काठी हाती घेत नरेशनं बिबट्याला मारायला सुरुवात केली. आरडाओरड ऐकल्यावर आज्जीदेखील लगेचच कोयता घेऊन बिबट्याच्या दिशेने धावली आणि बिबट्याला पळवून लावले. या झटापटीत नरेश आणि हर्षद दोघेही जखमी झाले. त्यांना उपचारासाठी रुग्णालयात दाखल करण्यात आले. नरेशच्या धैर्याला पोलिसांकडून सलाम करण्यात आला. नरेशच्या शौर्याबद्दल पंचक्रोशीत त्याचे कौतुक करण्यात येत आहे.
दरम्यान, आश्चर्यचकीत करणारी गोष्ट म्हणजे दुसऱ्या दिवशी हाच बिबट्या मृत झाल्याचे वनअधिकाऱ्यांना समजले. १० ते १२ वर्षाच्या या बिबट्याचा मृतदेह शवविच्छेदनासाठी संजय गांधी राष्ट्रीय उद्यानात पाठवण्यात आला. वनरक्षक पुढील तपास करत आहेत.