देशभरात उसळलेला तापमानाचा पारा फ्रिज व एसी (वातानुकूलित यंत्रणा) उत्पादकांच्या पथ्यावर पडला आहे. एप्रिल व मे या दोन महिन्यात फ्रिज व एसीच्या विक्रीत देशभरात यंदा तब्बल १५ टक्क्यांनी वाढ झाल्याची माहिती इलेक्ट्रॉनिक वस्तूंच्या विक्रेत्यांनी दिली आहे. मार्च ते मे या कालावधीत देशभरात तब्बल ४५ लाख एसी विकले गेल्याचा प्राथमिक अंदाज आहे.
‘गेल्या वर्षी याच कालावधीत एसीच्या विक्रीत पाच ते सात टक्के घट झाली होती. यंदा मात्र एसीची विक्री किमान १५ ते १८ टक्क्यांनी तर, फ्रिजची विक्री १० ते १२ टक्क्यांनी वाढली आहे’, अशी माहिती कन्झ्युमर इलेक्ट्रॉनिक्स अँड अप्लायन्सेस मॅन्युफॅक्चरर असोसिएशनचे अध्यक्ष कमल नंदी यांनी दिली.
देशभरात मागणी
एप्रिल व मेमध्ये फ्रिज व एसीच्या विक्रीत दुपटीने वाढ झाली. मार्चमध्ये दक्षिण व मध्य भारतात विक्रीचा जोर होता. तर, त्यानंतरच्या दोन महिन्यांत पूर्व, पश्चिम व उत्तर भारतात अधिक विक्री झाली, अशी माहिती व्होल्टासचे सीईओ प्रदीप बक्षी यांनी दिली. पॅनासोनिक इंडिया व एलजी इलेक्ट्रॉनिक्सने तर एसीविक्रीत अनुक्रमे ५० व ६० टक्के वाढ झाल्याचा दावा केला. एसीविक्रीच्या क्षेत्रात भारतीय बाजारात सध्या २०पेक्षा अधिक कंपन्या कार्यरत आहेत.