२००२मध्ये त्याचा खून झाला होता, पण त्याच्या शरीराचा सांगाडा त्याच्या कुटुंबियांना देण्यातच आला नाही. १७ वर्षांनी कोथरूड पोलीस स्टेशनच्या मुद्देमाल खोलीत त्याच्या शरीराचा सांगाडा पुन्हा सापडला. पोलिसांनी त्या सांगाड्याचा इतिहास शोधला आणि अखेर निखील रणपिसेच्या सांगाड्यावर तब्बल १७ वर्षांनंतर काही दिवसांपूर्वी कोथरूड पोलीस स्टेशनातील पहिल्या मजल्यावरची मुद्देमाल खोली साफ करण्यात आली. तेव्हा त्या खोलीत एक खोकं सापडलं. त्या खोक्यावर मानवी सांगाडा असल्याच लिहिलं होतं. हे पाहून खोलीतील सामान हलवायला आलेले पोलीस कर्मचारी चक्रावलेच. त्यांनी लगेच वरिष्ठांना या खोक्याची माहिती दिली. त्या खोक्यावर खटला क्रमांकही लिहिला होता. खटला क्रमांकाच्या आधारे हा सांगाडा कोणाचा आहे याचा शोध लावण्यात आला.
२००२मध्ये एमआयटी कॉलेज मागील टेकडीवर काही दिवसांपासून कुजणारं एक प्रेत मिळालं होतं. २ वर्ष शोध घेतल्यानंतर हे प्रेत निखील रणपिसे नावाच्या १६ वर्षांच्या तरुणाचं असल्याचं स्पष्ट झालं. लगेच त्याच्या वडिलांना याबाबत माहिती देण्यात आली होती. निखीलचा त्याच्याच दोन मित्रांनी खून केला होता. निखीलच्या एका नातेवाईकाच्या घरी त्यांनी चोरी केली होती. पण पैशाच्या वाटणीवरून वाद झाल्यामुळे त्याच्या दोन मित्रांनी त्याचा खून केल्याची बाब समोर आली होती. २००६मध्ये त्या दोन मित्रांची निर्दोष मुक्तता करण्यात आली. जेव्हा हा खटला बंद करण्यात आला तेव्हा कोर्टाने पोलिसांना निखीलच्या सांगाड्यावर अंत्यसंस्कार करा असे निर्देश दिले होते. पण तत्कालीन अधिकाऱ्यांच्या बदल्या झाल्यामुळे याकडे कोणी लक्ष दिलं नाही आणि तो सांगाडा तसाच खोक्यात पडून राहिला.
तब्बल १३ वर्षांनी हा सापळा हाती लागल्यानंतर पोलिसांनी लगेच निखील रणपिसेच्या वडिलांचा शोध घेतला. तेव्हा तब्येतीची कारणं देत आपण निखीलवर अंत्यसंस्कार करण्यास असमर्थ आहोत असं त्यांनी सांगितलं. पण अंत्यसंस्कार करण्यासाठी घटनास्थळी उपस्थित राहू अशी ग्वाहीही त्यांनी दिली. त्यानुसार पोलिसांनी निखीलच्या सांगाड्यावर अंत्यसंस्कार केले आहेत .