पाटील इस्टेट येथील झोपडपट्टीतील काही घरांना सोमवारी रात्री आग लागली. अग्निशामक दलाच्या जवानांनी वेळीच घटनास्थळी पोहचून आग नियंत्रणात आणली. पाटील इस्टेट येथे काही महिन्यांपूर्वी मोठी आग लागली होती. सिलेंडरच्या स्फोटामुळे आग पसरली होती. ही घटना ताजी असल्याने सोमवारी रात्री आग लागताच नागरिक घाबरले. सावधगिरी म्हणून ते सिलेंडर घेऊन घराबाहेर पडले.
आग वाढत असल्याचे पाहून लोक अधिकच घाबरले. पुन्हा तशीच आग भडकते की काय, अशी भीती नागरिकांमध्ये निर्माण झाल्याने बराचवेळ तणावाचे वातावरण होते. मात्र अग्निशामक दलाच्या जवानांनी वेळीच घटनास्थळी पोहचून आग नियंत्रणात आणली. अग्निशामक दलाच्या अधिकाऱ्यांनी सांगितले की, रात्री बाराच्या सुमारास पाटील इस्टेट येथे सिलिंडरचा स्फोट झाला व त्यानंतर आग भडकली. चार-पाच घरांना आग लागली. आगीची दाहकता पाहून लोक घाबरले होते. पूर्वीप्रमाणे मोठी घटना घडू नये म्हणून ते सिलेंडर घेऊन रस्त्यावर आले. अग्निशामक दलाच्या सात गाड्या आणि दोन टँकरच्या सहायाने आगीवर वेळीच नियंत्रण मिळवल्याने मोठी दुर्घटना टळली. कोणतीही जीवितहानी झाली नाही.
दरम्यान, आग विझल्यानंतरही लोकांमध्ये भीतीचे वातावरण होते.