आर. एम. लोढा यांना हॅकर्सनं एक लाख रुपयांचा गंडा घातल्याचं उघडकीस आलं आहे. या प्रकरणी मालवीय नगर पोलीस ठाण्यात गुन्हा दाखल करण्यात आला आहे.
पोलिसांच्या माहितीनुसार, लोढा यांना १९ एप्रिलला मध्यरात्री १ वाजून ४० मिनिटांनी त्यांचे मित्र निवृत्त न्यायाधीश बी. पी. सिंह यांच्या खासगी मेलवरून एक मेल आला होता. हा मेल त्यांनी साडेतीन वाजता वाचला. त्यानंतर सिंह यांना फोन केला. पण त्यांचा फोन बंद आला. त्यानंतर लोढा यांनी चार वाजताच्या सुमारास बँक खात्याची माहिती मेलद्वारे मागवली. हॅकरनं दहा मिनिटांत ही माहिती लोढा यांना मेलद्वारे पाठवली. सिंह यांच्या भाच्याला रक्ताशी संबंधित आजार असल्यानं लाखो रुपयांची गरज असून तातडीची मदत हवी आहे, असा उल्लेख हॅकरनं मेलमध्ये केला होता. त्यामुळं लोढा यांनी स्वतःच्या दोन बँक खात्यांतून १ लाख रुपये मेलमध्ये उल्लेख केलेल्या खात्यात ट्रान्सफर केले. ३१ मे रोजी सिंह यांनी त्यांचा इ-मेल आयडी हॅक झाल्याचं सांगितलं. हॅकरनं मेलद्वारे लोकांकडे पैसे मागितल्याचं समजल्यानंतर आपलीही फसवणूक झाल्याचं लोढा यांच्या लक्षात आलं. या प्रकरणी मालवीय नगर पोलीस ठाण्यात गुन्हा नोंदवण्यात आला असून, चौकशी सुरू असल्याचं पोलिसांनी सांगितलं.