अमेरिकेतील प्रतिष्ठेच्या ‘स्पेलिंग बी’ स्पर्धेतील यंदाच्या आठ संयुक्तविजेत्यांपैकी ७ जण भारतीय वंशाचे आहेत. भारतीय वंशाची मुले या स्पर्धेत नेहमीच वरचढ ठरलेली दिसतात, मात्र यंदाच्या निकालातील भारतीय वंशाच्या मुलांची संख्या विक्रमी ठरली आहे. त्यांनी सुमारे ५० हजार डॉलरची बक्षिसे पटकावली आहेत.
कॅलिफोर्नियाचा रिषिक गंधश्री (१३), मेरिलँड येथील साकेत सुंदर(१३), न्यू जर्सी येथील श्रुतिका पाधी (१३), टेक्सास येथील सोहम सुखटणकर (१३), अभिजित कोडाळी (१२) आणि रोहन राजा (१३), न्यू जर्सीतील ख्रिस्तोफर सेराओ (१३) अशी विजेत्यांची नावे आहेत.
या स्पर्धेला ९४ वर्षांचा इतिहास आहे. मात्र, दोनपेक्षा अधिक संयुक्त विजेते घोषित केल्याचे स्पर्धेच्या इतिहासात प्रथमच घडले आहे. तसेच २००७नंतर आता प्रथमच विजेत्यांमध्ये अमेरिकन विद्यार्थ्याचे नाव आले आहे असून, एरिन हॉवर्ड (१४) असे त्याचे नाव आहे. या स्पर्धेत ७ ते १४ वयोगटातील ५६५ स्पर्धकांनी भाग घेतला होता. संपूर्ण अमेरिकेतून तसेच कॅनडा, घान आणि जमैका यांसह इतर देशांतून हे स्पर्धक आले होते. ही स्पर्धा लोकप्रिय आणि प्रतिष्ठेची असून ती जिंकण्यासाठी विद्यार्थी काही महिने तयारी करत असतात.