राज्यातील दुष्काळ, मान्सूनपूर्वपावसानेही फिरवलेली पाठ या पार्श्वभूमीवर उन्हाचा ताप आणि पाणीटंचाईचे चटके यात रोजचीच भर पडत आहे. हवामान विभागाच्या अंदाजानुसार केरळमध्ये ६ जूनपर्यंत मान्सून दाखल होण्याचा अंदाज आहे. केरळमधील आगमन लांबल्याने राज्यातील आणि पुढे देशातीलही मान्सून प्रवास लांबू शकतो. या पार्श्वभूमीवर यंदाच्या पावसाळ्याची चिंता नागरिकांना वाटू लागली आहे. त्यातच कृत्रिम पावसाच्या प्रयोगाच्या चर्चा सुरू झाल्याचीही भर पडली आहे.
आतापर्यंत मान्सूनच्या प्रवासासाठी अनुकूल स्थिती निर्माण झाली नव्हती. मात्र आता ही परिस्थिती बदलली असून येत्या ४८ तासांमध्ये मान्सून पूर्ण अंदमान व्यापेल तसेच मालदिव, बंगालच्या उपसागरातील काही भाग व्यापेल, असा अंदाज हवामान विभागाने वर्तवला आहे. सर्वसाधारणपणे १ जूनला मान्सून केरळमध्ये येतो. मात्र यंदा तो ६ जूनपर्यंत केरळमध्ये पोहोचेल, असा अंदाज आहे. देशात मान्सून दाखल व्हायला उशीर झाल्याने देशातील मान्सूनच्या पुढच्या प्रवासावरही परिणाम होण्याची शक्यता आहे, अशी माहिती प्रादेशिक हवामान विभागाचे उपमहासंचालक कृष्णानंद होसाळीकर यांनी दिली. हा प्रवास लांबल्याने जूनमध्ये पावसाची सरासरी कमी होऊ शकते, असे काही मॉडेल्सनुसार निदर्शनास आले आहे. यंदा मान्सूनवर ‘एल निनो’चे सावट आहे. जून-जुलैमध्येही ‘एल निनो’चा प्रभाव असेल. जेव्हा ‘एल निनो’ घटक प्रभावी असतो तेव्हा त्याचा परिणाम देशातील पावसावर होतो, असेही आतापर्यंतचे सर्वसाधारण निरीक्षण आहे, असेही होसाळीकर यांनी स्पष्ट केले. मात्र याचा नेमका परिणाम केरळमध्ये मान्सून दाखल झाल्यावरच वर्तवता येईल.