गुजरातजवळच्या समुद्रात तटरक्षक दलाने जबरदस्त कामगिरी केली असून, सहाशे कोटी रुपयांचे अंमली पदार्थ भारतात तस्करीसाठी नेणारी पाकिस्तानी बोट मंगळवारी जप्त करण्यात आली. विशेष म्हणजे, आंतरराष्ट्रीय सागरी हद्दीला लागून असलेल्या २०० सागरी मैल परिसरात गेल्या दोन दिवसांपासून अथक शोध घेतल्यानंतर तटरक्षक दलास ही बोट पकडण्यात यश आले.
एक पाकिस्तानी बोट अंमली पदार्थांचा मोठा साठा घेऊन भारतीय सागरी हद्दीत प्रवेश करणार असल्याची खबर १९ मे रोजी तटरक्षक दलाला मिळाली होती. त्यानंतर महसूलविषयक गुप्तवार्ता संचानालयाकडूही या बोटीविषयी तटरक्षक दलास सतर्क करण्यात आले. त्यानंतर तटरक्षक दलाने ‘अरंजय’ ही वेगवान गस्ती नौका, दोन पाठलाग करणाऱ्या बोटी आणि हवाई टेहाळणी करणाऱ्या विमानासह या बोटीचा शोध सुरू केला. मंगळवारी सकाळी तटरक्षक दलाला जखाऊ किनाऱ्यापासून आठ सागरी मैल अंतरावर ही ‘अल मदिना’ ही मच्छिमार बोट दिसली. पाकिस्तानी खलाशांनी बोट पळविण्याचा खूप प्रयत्न केला; पण खवळलेल्या समुद्रातही तटरक्षक नौकांनी बोटीला घेरले. खलाशांनी अंमली पदार्थांच्या गोणी पाण्यात फेकल्या. मात्र त्यापैकी सात गोण्या जप्त करण्यात आल्या. बोटीसह सहा पाकिस्तानी खलाशांना ताब्यात घेण्यात आले, अशी माहिती तटरक्षक दलाचे अतिरिक्त महासंचालक व्हीएसआर मूर्ती यांनी दिली.