जिल्हाधिकाऱ्यांनी बुद्धपौर्णिमेला नागपूर जिल्ह्यात लागू केलेल्या दारूबंदी आदेशाला मुंबई उच्च न्यायालयाच्या नागपूर खंडपीठाने स्थगिती दिली आहे. त्यामुळे शनिवारी जिल्ह्यात दारूविक्री सुरू राहणार आहे.
बुद्धपौर्णिमेला सार्वजनिक सुटी असून त्यादिवशी कायदा व सुव्यवस्था कायम राहावी, याउद्देशाने जिल्हाधिकाऱ्यांनी ६ मे रोजी दारूबंदी कायद्याच्या कालम १४२ (१) अन्वये दारूविक्रीवर बंदी घालणारा आदेश दिला. त्या आदेशाविरोधात नागपूर जिल्हा परमिट रूम संघटनेच्यावतीने उच्च न्यायालयात याचिका दाखल केली.
जिल्हाधिकाऱ्यांनी दिलेला आदेश हा मोघम स्वरूपाचा आहे. तसेच कायद्यातील तरतुदींचे पालन न करताच आदेश काढण्यात आला आहे. त्यामुळे सदर आदेश रद्द करण्यात यावा, अशी विनंती याचिकाकर्त्या संघटनेने केली. त्यावर अवकाशकालीन न्यायमूर्ती मनीष पितळे यांच्या एकलपीठासमोर सुनावणी झाली. तेव्हा हायकोर्टाने जिल्हाधिकाऱ्यांना नोटीस बजावून उत्तर सादर करण्याचा आदेश दिला. या याचिकेवर शुक्रवारी पुन्हा सुनावणी झाली. तेव्हा जिल्हाधिकाऱ्यांनी पोलिस उपायुक्तांनी २९ एप्रिल रोजी दिलेले पत्र दाखल केले. त्यात बुद्धपौर्णिमेला काही असामाजिक तत्त्व दारू पिऊन कायदा व सुव्यवस्थेला धोका निर्माण करू शकतात, अशी शक्यता वर्तवण्यात आली. त्यामुळे दारूबंदीचा आदेश काढण्यात आला, असे हायकोर्टात नमूद करण्यात आले.
दरम्यान, जिल्हाधिकाऱ्यांनी दिलेले स्पष्टीकरण समाधानकारक नाही. तेव्हा न्यायालयाने कायद्यातील तरतुदी लक्षात घेता जिल्हाधिकाऱ्यांनी दिलेल्या आदेशाला अंतरिम स्थगिती दिली. तसेच याचिकेतील इतर मुद्द्यांवर १२ जून रोजी पुढील सुनावणी निश्चित केली. याचिकाकर्त्यांच्यावतीने अॅड. सुमित बोडलकर तर सरकारच्यावतीने अॅड. मयुरी देशमुख यांनी बाजू मांडली.