बेस्ट उपक्रमातील बसचालक राजाराम दळवे (४९) यांना बुधवारी सकाळी १०.३० वाजता बस चालवत असतानाच हृदयविकाराचा जोरदार झटका आला. त्यांनी बस बाजूला घेऊन अपघात टाळला. मात्र, रुग्णालयात दाखल करण्यापूर्वीच त्यांचा मृत्यू झाल्याचे डॉक्टरांनी जाहीर केले.
५२३ क्रमांकाची बस चालवत दळवे कांजूरमार्ग येथे पोहोचले तेव्हा त्यांच्या छातीत कळा येऊ लागल्या. त्यांनी तातडीने बसमधील सहकारी वाहकाला बोलावून घेतले. छातीत दुखत असल्याचे त्यांनी वाहकांच्या कानावर घातले. मग, दळवे यांनीच बस एका बाजूस नेली. त्यानंतर वाहकाने इतर प्रवाशांच्या मदतीने दळवे यांना तातडीने अग्रवाल रुग्णालयात नेले. पण रुग्णालयात दाखल करण्यापूर्वीच ते मृत झाले होते.