पालघर या आदिवासीबहुल जिल्ह्यातील तरुण पत्रकार तेजस हरड याने वाडा ते ऑक्सफोर्ड अशी झेप घेतली आहे. त्याला इंग्लडमधील ऑक्सफर्ड विद्यापीठात माध्यमांशी निगडीत संशोधनासाठी ‘रॉयटर्स’ या नामवंत आंतरराष्ट्रीय माध्यमसंस्थेची फेलोशिप मिळाली आहे.
पालघर जिल्ह्यातील वाडा तालुक्यातील बुधावली गावातील जिल्हा परिषदेच्या शाळेत शिकलेला तेजस इकानॉमिक अँड पॉलिटिकल वीकली मासिकासाठी प्रुफ रीडर म्हणून काम करतो. तेजसची घरची परिस्थिती गरिबीची होती. स्वत:ची शेती नाही. त्याचे वडील गवंडी काम करतात तर आई शेतमजुरी आणि अन्य लहानसहान कामे करते. घरात कुणालाही उच्चशिक्षणाची पार्श्वभूमी नाही. वाडा तालुक्यातली गावे म्हणजे अगदी बाजारासाठीही लोकांना तालुक्याला जाण्याशिवाय पर्याय नाही. त्यामुळे पेपर, अवांतर वाचनासाठी पुस्तके, वाचनालये, ग्रंथालये यांचाही अभाव होता. अशा सर्व बाजूंनी प्रतिकूल परिस्थितीत तेजसने आई-वडिलांच्या कष्टांतून प्रेरणा घेत पत्रकार होण्याचे स्वप्न नवव्या इयत्तेपासूनच बाळगले होते. दहावीनंतर, बारावीपर्यंतचे शिक्षणही त्याने वाड्यातील कॉलेजमध्ये पूर्ण केले आणि पदवीच्या शिक्षणासाठी तो मुंबईतील रुईया कॉलेजला गेला. तिथे त्याने बीएमएम पूर्ण केले.
पदवीपर्यंत शिक्षण घेतल्यावर एकही दिवस घरी बसण्यासारखी त्याची परिस्थिती नव्हती. त्यामुळे लगेचच त्याने शिक्षण क्षेत्रात काम करणाऱ्या एका संस्थेत नोकरीला सुरुवात केली. तिथे वर्षभर नोकरी केल्यानंतर इपीडब्ल्यूमध्ये भरती निघाली आणि त्याने मेहनतीने ती संधी मिळविली. येथेच काम करत असताना त्याने रॉयटर्सच्या फेलोशिपसाठी अर्ज केला होता. येत्या सप्टेंबरदरम्यान तो संशोधनासाठी इंग्लडला जाणार आहे.