मुंबई-गोवा महामार्गावर संगमेश्वर-तुरळ येथे रस्ता ओलांडत असताना वाहनाची धडक बसल्याने बिबट्याचा मृत्यू झाला. आज पहाटे ही घटना घडली. पाणवठ्याच्या शोधात हा बिबट्या रस्ता ओलांडत असावा व त्याचदरम्यान अपघात झाला असावा, असा अंदाज स्थानिक ग्रामस्थांनी व्यक्त केला आहे.
तुरळ, धामापूर, करजुवे आणि कडवई या डोंगर पट्ट्यात दाट जंगल असून या भागात मोठ्या प्रमाणात वन्यप्राण्यांचा संचार असतो. सध्या या परिसरात पाण्याची तीव्र टंचाई असून पाणवठ्याच्या शोधात वन्यप्राणी मानवी वस्त्यांकडे येत आहेत. यातूनच बिबट्याला अपघाताला सामोरे जावे लागले असावे, अशी शक्यता ग्रामस्थानी व्यक्त केली.
आज सकाळी बिबट्या रस्त्याच्या कडेला मृतावस्थेत पडला असल्याचे पाहून ग्रामस्थांनी लगेचच याबाबत स्थानिक पोलीस पाटील राजा मेने यांना माहिती दिली. त्यानंतर वनविभागाला कळवण्यात आले. वनाधिकारी सुरेश उपरे कर्मचाऱ्यांसह घटनास्थळी दाखल झाल्यानंतर वैद्यकीय तपासणी करून बिबट्यावर पुढील सोपस्कार करण्यात आले.