मुस्लिम धर्मीयांचा पवित्र रमजान महिन्याचा उपवास (रोजा) येत्या मंगळवारपासून (दि. ७) सुरू होणार असल्याचे पुण्याच्या हिलाल सीरत कमिटीने जाहीर केले आहे. रविवारी सायंकाळी शहरात तसेच अन्य ठिकाणी कोठेही चंद्रदर्शन न झाल्याने कमिटीने मंगळवारपासून रमजान महिना सुरू होणार असल्याचे सांगितले.
शनिवारी अमावास्या असल्याने रविवारी चंद्रदर्शन होईल, अशी अपेक्षा होती. मात्र, पुण्यासह मुंबई आणि नजीकच्या शहरात कोठेही चंद्रदर्शन झाल्याचे वृत्त नाही. त्यामुळे सायंकाळी चंद्रदर्शन न झाल्याने अखेर हिलाल सीरत कमिटीने शहरातील मुस्लिम धर्मगुरूंची बैठक बोलाविली. त्या बैठकीत मौलाना गुलाम अहमद कादरी, मौलाना निजामुद्दीन फकरूद्दीन, मौलाना हाफीज इद्रीस यांच्यासह अनेक धर्मगुरू तसेच कमिटीचे सिराज बागवान, आतिक उस्ताद आदी उपस्थित होते. या बैठकीत चंद्रदर्शन न झाल्याने सोमवारी रमजानचा उपवास होणार नाही. त्याऐवजी मंगळवारी (दि. ७) पहिला उपवास सुरू होईल, असा निर्णय घेण्यात आला, अशी माहिती सीरत कमिटीचे सचिव रफीउद्दीन शेख यांनी दिली.