प्रसूती झालेल्या महिलेला पिण्यासाठी दिलेल्या सूपमध्ये रक्ताने माखलेले कापसाचे बोळे आढल्याचा प्रकार जहांगीर रुग्णालयात घडला. या प्रकरणी रुग्ण महिलेच्या पतीने कोरेगाव पार्क पोलिस ठाणे, अन्न व औषध प्रशासन आणि महापालिकेच्या आरोग्य विभागाकडे लेखी तक्रार केली आहे. वीणा सातपुते (रा. जरांडे नगर, महंमदवाडी) आणि यांचे पती महेश सातपुते यांनी तक्रार दिली आहे. हा प्रकार २९ एप्रिल रोजी घडला.
महेश यांनी दिलेल्या माहितीनुसार, त्यांच्या पत्नी वीणा यांना प्रसूतीसाठी २८ एप्रिल रोजी जहांगीर हॉस्पिटलमध्ये दाखल करण्यात आले होते. त्याच दिवशी त्या प्रसूत झाल्या. दुसऱ्या दिवशी रुग्णालयाच्या सेवा देणाऱ्या व्यक्तीने त्यांना सकाळी पिण्यासाठी थर्मासमध्ये सूप दिले. मात्र, वीणा यांनी ते लगेच घेतले नाही. दोन तासांनी ते सूप रुग्णालयाच्या व्यक्तीने परत गरम करून आणून दिले असता त्यामध्ये रक्ताने माखलेले दोन कापसाचे बोळे आढळून आले.
हा प्रकार सातपुते यांनी रुग्णालय प्रशासनाच्या लक्षात आणून दिला. रुग्णालयाने संबंधित व्यक्तीवर कारवाई केली जाईल, असे आश्वासन दिले. एक मे रोजी वीणा यांना डिस्चार्जही दिला. दरम्यान या तक्रारीची दखल न घेतल्याने सातपुते यांनी या प्रकाराची लेखी तक्रार पोलिसांत दाखल केली व सर्व पुरावेही दिले. मात्र, अद्याप रुग्णालयाविरुद्ध कोणतीही कारवाई करण्यात आली नसल्याचे सातपुते यांनी सांगितले.
याबाबत पोलिस निरीक्षक मदन बहाद्दुरपुरे म्हणाले, ‘जहांगीर रुग्णालयात महिलेला देण्यात आलेल्या सूपमध्ये रक्ताने माखलेले कापसाचे बोळे सापडल्याबद्दल तक्रार आली आहे. त्याबाबत अधिक चौकशी सुरू आहे.’
सूपमध्ये रक्ताने माखलेले बोळे सापडणे हा खूप घाणेरडा प्रकार आहे. इथून पुढे माझ्या पत्नीला आरोग्यविषयक समस्या निर्माण झाली; तर त्याला जहांगीर हॉस्पिटलच जबाबदार राहील. हा प्रकार घडूनही रुग्णालय प्रशासन संबंधितांवर कारवाई करण्यास चालढकल करत आहे. – महेश सातपुते, तक्रारदार
महिलेच्या आहारात रक्ताने माखलेले कापसाचे बोळे सापडल्याचा प्रकार धक्कादायक आहे. त्यासंदर्भात रुग्णालय प्रशासनाने अज्ञात व्यक्तीविरुद्ध पोलिस ठाण्यात तक्रार दाखल करण्याची प्रक्रिया सुरू केली आहे; तसेच तक्रारदारांना रुग्णालय प्रशासनाकडून योग्य प्रतिसाद देण्यात आला आहे. – निधी तपाडिया, जनसंपर्क अधिकारी, जहांगीर रुग्णालय