आंतरजातीय प्रेम प्रकरणाला विरोध असल्याने आणि आपला प्रियकर कथित निम्नजातीचा असल्याने प्रचंड छळ होत असल्याचा आरोप करत पुण्यातील एका १८ वर्षीय मुलीने आपल्याच आई-वडिलांच्या विरोधात मुंबई उच्च न्यायालयात धाव घेतली आहे. ‘आई-वडील आणि काकांकडून आमच्या जीवाला धोका असल्याने आम्हा दोघांना २४ तास पोलिस सुरक्षा द्यावी’, अशी विनंती या मुलीने याचिकेद्वारे केली आहे. या याचिकेवर तातडीने सुनावणी व्हावी, याकरिता प्रयत्न करणार असल्याचे मुलीचे वकील अॅड. नितीन सातपुते यांनी सांगितले.
पुण्यातील उंबरे येथील ही मुलगी लॉ अभ्यासक्रमाच्या दुसऱ्या वर्षात सध्या शिकत आहे. २९ ऑगस्ट २०१८ रोजी ही मुलगी १८ वर्षांची झाली. तिचे कथित निम्न जातीमधील १९ वर्षीय मुलावर प्रेम जडले आहे. याविषयी तिच्या आई-वडिलांना कळल्यानंतर त्यांनी तिला त्या मुलाला भेटण्यापासून रोखले. तसेच तिला कॉलेजमध्ये जाण्यासही बंदी घातली. वकील असलेले मुलीचे काका ही माहिती कळल्यानंतर संतापले आणि त्यांनी गावठी कट्टा आणून थेट मुलीच्या डोक्याला लावून धमकावले. त्याचबरोबर हे प्रेमसंबंध तोडले नाही तर दोघांनाही जीवे मारण्याची धमकीही त्यांनी दिली. आई-वडिलांनीही मुलीला प्रचंड मारहाण करत तिचा खूप छळ केला. शिवाय हे प्रेमप्रकरण थांबवले नाही तर मुलाला अपहरण व बलात्काराच्या खोट्या प्रकरणात अडकवण्याची धमकीही दिली, असा आरोप याचिकेत करण्यात आला आहे. ‘२७ एप्रिलला आई-वडील मला बळजबरीने रेल्वेने तमिळनाडूमध्ये नेत होते. त्यावेळी जीवाच्या भीतीने मी कशीबशी त्यांच्या हातून माझी सुटका करून घेतली आणि नंतर माझ्या प्रियकराला फोन केला. मी आता त्याच्यासोबतच राहण्याचा निर्णय घेतला असून तो २१ वर्षांचा होऊन सज्ञान झाल्यानंतर त्याच्याशीच विवाह करणार आहे’, असेही या मुलीने तातडीने केलेल्या या याचिकेत म्हटले आहे.
‘मी १८ वर्षांची असल्याने सज्ञान आहे आणि त्यामुळे मला माझ्या विवाहाचा निर्णय घेण्याचा कायदेशीर अधिकार आहे. परंतु, मुलगा निम्न जातीचा असल्याने आई-वडील व काकांचा तीव्र विरोध असून त्यांच्याकडून आम्हा दोघांच्या जीवाला धोका आहे. त्यामुळे आम्हाला सुरक्षा देण्याचे निर्देश पोलिसांना द्यावेत आणि पालकांना कोणतेही गुन्हेगारी कृत्य करण्यापासून रोखावे’, अशी विनंतीही मुलीने याचिकेत केली आहे.