स्वत:च्या लग्नासाठी रजा नाकारल्याने संतापलेल्या आसाम राज्य सशस्त्र पोलीस दलाच्या जवानाने आपल्या वरिष्ठावर आपल्या बंदुकीतून १३ गोळ्या झाडल्या. यात पोलीस उपनिरीक्षक भोलानाथ दास यांचा मृत्यू झाला, तर दोघे जखमी झाले आहेत. ही घटना काल (गुरुवार) घडली. लक्ष्मीकांत असे या २६ वर्षीय शिपायाचे नाव असून त्याने २० मे या दिवशी विवाह सोहळा आयोजित केला होता.
जवान लक्ष्मीकांत हा नैराश्यात होता. त्याची मनस्थिती चांगली नसल्याने त्याच्यावर उपचारही सुरू होते. रजा नाकारल्यामुळे त्याचा त्याचे वरिष्ठ पोलीस उपनिरीक्षक भोलानाथ दास यांच्याशी वाद झाला. या नंतर झालेल्या वादानंतर लक्ष्मीकांत याने थेट दास यांच्यावर गोळ्या झाडल्या. यात वरिष्ठ पोलीस निरीक्षक अनिल राजबंशी आणि शिपाई रोंतूमणी बोधक जखमी झाले. हे दोघे अत्यवस्थ असल्याचे समजते.
ही घटना घडल्यानंतर लक्ष्मीकांत याने पळून जाण्याचा प्रयत्न केला. मात्र त्याच्या सहकाऱ्यांनी त्याला पकडून पोलिसांच्या हवाली केले. लक्ष्मीकांत याला वैद्यकीय मदत दिली जाणार असून या प्रकरणी प्रशासकीय चौकशी करण्याचे आदेश हावडा जिल्हा दंडाधिकारी चैताली चक्रवर्ती यांनी दिले आहेत.
या बाबत सूत्रांनी दिलेल्या माहितीनुसार, लक्ष्मी कांत यांचा सुटीवरून वरिष्ठाशी वाद झाला होता. लक्ष्मीकांतला लग्नासाठी एका आठवड्याची रजा हवी होती. मात्र त्याचा रजेचा अर्ज फेटाळण्यात आला. त्यानंतर बुधवारी संध्याकाळी रजा नाकारल्याचे सांगण्यासाठी लक्ष्मीकांतला कार्यालयात बोलावण्यात आले. तेव्हा पासून लक्ष्मीकांतच्या मनात राग होता. त्यानंतर दुसऱ्या दिवशी त्याने तब्येत ठीक नसल्याचे कारण देत त्याने रुट मार्चसाठी जाणे टाळले. मात्र वरिष्ठांनी त्याचे मन वळवले. पुढील वेळेलाही लक्ष्मीकांत याने रुटमार्चसाठी येण्यास नकार दिला. त्यानंतर दास यांनी लक्ष्मीकांतला शिस्तभंगाच्या कारवाईचा इशारा दिला.
वरिष्ठ देत असलेल्या अपमानजक वागणुकीमुळे माझी मानसिक स्थिती बिघडली असून आरोग्याचा प्रश्न निर्माण झाल्याचा आरोप लक्ष्मीकांत याने केला. त्यावरुन झालेल्या वादानंतर लक्ष्मीकांतने दास यांच्यावर रागाच्या भरात गोळ्या झाडल्या.
या प्रकरणी पुढील पोलीस कारवाई सुरू करण्यात आली आहे.