भारतीय कुस्तीपटू विनेश फोगाट आणि बजरंग पुनिया यांची राजीव गांधी खेलरत्न पुरस्कारासाठी शिफारस करण्यात आली आहे. भारतीय कुस्ती संघाने केंद्र सरकारकडे ही शिफारस केली आहे.
विनेश फोगाट हिनं आशियाई कुस्ती स्पर्धेत ५३ किलो वजनी गटातील कांस्यपदक शुक्रवारीच जिंकलं होतं. तर बजरंग पुनियाने आंतरराष्ट्रीय टुर्नामेंटमध्ये आतापर्यंत ८ सुवर्णपदकं जिंकली आहेत. त्याने कॉमनवेल्थ आणि आशियाई गेम्समध्येही सुवर्णपदक जिंकली आहेत. त्यामुळे या दोघांच्या नावाची खेलरत्न पुरस्कारासाठी शिफारस करण्यात आली आहे. कुस्ती संघाने राहुल आवारे, हरप्रीत सिंह, दिव्या ककरन आणि पूजा ढांडा यांच्या नावाची अर्जुन पुरस्कारासाठी शिफारस केली आहे. तर विरेंदर कुमार, सुजीत मान, नरेंद्र कुमार आणि विक्रम कुमार यांच्या नावाची द्रोणाचार्य पुरस्कारासाठी शिफारस करण्यात आली आहे.
केंद्रीय क्रीडा मंत्री राज्यवर्धन राठोड हे येत्या सप्टेंबरमध्ये आशियाई खेळाडूंच्या कामगिरीची समीक्षा करणार आहेत. त्यानंतर निवड समितीला राष्ट्रीय क्रीडा पुरस्कारांसाठी क्रीडा मंत्रालयाकडून शिफारस केली जाईल. महान हॉकीपटू मेजर ध्यानचंद यांच्या जयंतीनिमित्त दरवर्षी २९ सप्टेंबर रोजी क्रीडा पुरस्कार दिले जातात. मात्र यावर्षी २५ सप्टेंबर रोजीच या पुरस्काराचं वितरण होणार आहे. याच काळात आशियाई स्पर्धा असल्याने हा निर्णय घेण्यात आला आहे.