घोडबंदरमधील जंगलात पाच फुटांचा डॉल्फिन पुरल्याचा प्रकार समोर आला आहे. अल्पवयीन मुलांनी मृत डॉल्फिनचे काढलेले फोटो सोशल मीडियावर व्हायरल झाल्यानंतर हा प्रकार उघडकीस आला आहे.
अल्पवयीन मुलांनी मृत डॉल्फिनचे काढलेले व्हिडिओ आणि फोटो सोशल मीडियावर व्हायरल झाल्यानंतर त्याबाबत परिसरातील स्थानिकांनी वनाधिकाऱ्यांना माहिती दिली. अधिकाऱ्यांनी मुलांचा शोध घेतला. ज्या ठिकाणी डॉल्फिन पुरला होता, तेथे त्या मुलांना घेऊन गेले. अधिकाऱ्यांनी डॉल्फिनचा मृतदेह ताब्यात घेऊन ठाण्यातील एसपीसीएमध्ये पाठवला. डॉल्फिनच्या मृत्यूचं कारण समजू शकलेलं नाही. पण जाळ्यात अडकल्यानं त्याचा मृत्यू झाल्याची शक्यता आहे, असं एसपीसीएमध्ये डॉक्टरांनी सांगितलं. ‘डॉल्फिनच्या मृत्यूचं नेमकं कारण काय, हे समजू शकलं नाही. तसंच डॉल्फिनच्या कुठेही जखमा झालेल्या नव्हत्या,’ असं ठाणे एसपीसीएच्या डॉ. नेहा शाह यांनी सांगितलं. आतापर्यंत आम्हाला काहीही संशयास्पद आढळलेलं नाही. मृत डॉल्फिनचे फोटो काढणाऱ्या मुलांकडे चौकशी करणार आहोत, असं वनाधिकारी जितेंद्र रामगावकर यांनी सांगितलं.