शिवसेनेचे नगरसेवक कमलाकर जामसंडेकर यांच्या हत्येप्रकरणी नाशिक मध्यवर्ती तुरुंगात शिक्षा भोगत असलेला गँगस्टर व माजी आमदार अरुण गवळी याला मुंबई उच्च न्यायालयाच्या नागपूर खंडपीठाने २८ दिवसांच्या ‘फर्लो’ सुटी मंगळवारी मंजूर केली. मात्र, ही सुटी मुंबईतील २९ एप्रिल रोजीचे मतदान संपल्यानंतरच म्हणजे ३० एप्रिलपासून लागू होईल, असेही न्या. झेड. ए. हक व न्या. विनय जोशी यांच्या खंडपीठाने स्पष्ट केले.
‘यापूर्वी सहा वेळा फर्लो व पॅरोलवर सुटी मिळूनही अर्जदाराने अटींचे उल्लंघन केलेले नाही आणि दिलेल्या तारखेलाच तो तुरुंगात परतला आहे’, असे गवळीतर्फे अॅड. राजेंद्र डागा यांनी न्यायालयाला सांगितले. मात्र, ‘सध्या लोकसभा निवडणूक सुरू असून त्यात २९ एप्रिलला मुंबईतील मतदान आहे. अर्जदाराकडून आदर्श आचारसंहितेचा भंग केला जाऊ शकतो. त्यामुळे फर्लो अर्ज मंजूर करू नये’, अशी विनंती सरकारी वकिलांनी केली. मात्र, खंडपीठाने अर्ज मंजूर करतानाच तो ३० एप्रिलपासून लागू होईल, असे आदेशात स्पष्ट केले.