ओव्हरहेड वायर किंवा पेंटाग्राफ तुटल्यानं मुंबईची लोकल वाहतूक विस्कळीत होण्याचे प्रकार नवीन नाहीत. त्यामागे अनेकदा तांत्रिक कारणे असतात. मात्र, आज हार्बर मार्गावर भलताच प्रकार घडला. रेल्वेच्या पेंटाग्राफवर कुणीतरी कमरेचा बेल्ट फेकल्यानं वायर तुटून लोकल ठप्प झाली. रेल्वे प्रशासनानं ट्विटरद्वारे ही माहिती दिली आहे.
मानखुर्द स्थानकाजवळ सकाळी साडेसहाच्या सुमारास हा प्रकार घडला. ओव्हरहेड वायर तुटल्यामुळं वाहतूक विस्कळीत झाली. ऐन गर्दीच्या वेळी वाहतूक ठप्प झाल्याचा मेसेज सोशल मीडियातून व्हायरलही झाला. प्रशासनानं तात्काळ हालचाली करून दुरुस्तीचं काम सुरू केलं. त्यावेळी रेल्वेच्या पेंटाग्राफवर कर्मचाऱ्यांना एक बेल्ट आढळून आला. त्यावेळी ओव्हरहेड वायरच्या तुटण्याचं कारण लक्षात आलं. दरम्यान, बिघाड दुरुस्त झाला असून वाहतूक पूर्ववत झाली आहे.
मुंबईतील लोकल मार्गाच्या आजूबाजूला अनेक ठिकाणी बेकायदा झोपडपट्ट्या आहेत. हार्बर मार्गावर याचं प्रमाण मोठं आहे. यापूर्वी लोकलवर दगडफेक झाल्याच्या घटनाही घडल्या आहेत. आता थेट ओव्हरहेड वायर व पेंटाग्राफलाच लक्ष्य करण्यापर्यंत समाजकंटकांची मजल गेल्यानं लोकल प्रवाशांच्या सुरक्षेचा प्रश्न पुन्हा ऐरणीवर आला आहे.